أمثال وحكم من الملحون
تنسيق الأستاذ عبد الجليل الكريفة

يقول الشيخ لكبير بن عطية في قصيدته: عَنْدْ اَلْحَدَّاقْ

قَالُو اَلَعْتَاقْ
مَشْتَاقْ اَلْقَا مَشْتَاقَا
وَشْهَقْ وَنْهَقْ صَابْ فَمُّو نَشْفْ مْنَ اَلرِّيقْ
رَجْلِيهْ اَعْلَى اَلْبَهْمُوتْ زَالْقَا

حَلَّسْ نَهَّاقْ
وَعْمَلْ لِيهْ اَلصَرْفَاقَا
وَنْوَا جَابو[1] اَيْعَانَدْ اَلْفُرْسَانْ اَبْتَحْمِيقْ
قَالْ اَرَا عَادَا لَلْمْسَابْقَا

[1]  حماره

يقول الشيخ الجيلالي امتيرد في قصيدته:  مَا فَالزِّينْ اَحْبِيبْ
مَنْ تَهْوَاهْ اَرْضِيهْ
وَتْرَكْ عَنُّ دِيّْ اَلْمْعَاتْبَا

يقول الشيخ محمد بوزيان في قصيدته: الفجر  
مَانَدْخُلْ سُوقْ الْمْزَاحْمَا بَصْنَاطَحْ وَجْبَاهِــي
حَاضِي عَرْضِي مَاْنِريدْ دْمُومَا  مَانَرْضَاهَــا
وَالْجَاحَدْ لَيْسْ نَصْغَاهْ

يقول سيدي عبد القادر العلمي في قصيدته:  زَالْ تَقْلِيدْ مَنْ صَلَّى خَلَفْ لِيمَامْ
تَاجَرْ بْغِيرْ ابْضَاعَا بَالْفْضُولْ يُتْهَامْ
كِدْخَلْ يَخْرَجْ حَدّْ اَشْطَارْتُ يِسَاوَمْ

يقول الشيخ الجيلالي امتيرد في قصيدته:  فَاطْمَا شَرْعْ اللهْ امْعَاكْ بِينْ لَرْيَامْ
لاَ اتْغَلْطِي حِينْ اتْنَظْرِي ابْيَاضْ لَكْمَـامْ
عَمَّرْ اسْرُورْ اهْلَ اَلْغَلَطْ مَا يْطِيبُــــو
لُو اشْرَقْتْ وُلاَحْتْ لَلْجَوْ شَمْسَكْ اعْـلاَمْ
لاَاغْنَى اللَّيلْ يَـاتِي خَلْفْهَا احْجِيبُــــو
لَوْ اتْعِيشِي مَا عَاشْتْ فِي الزْمَانْ لَهْرَامْ
لاَغْنَى مَنْ لَكْبَرْ يَاتِيكْ جُنْدْ شِيبُـــــو
لُوْ احْكَمْتِي وَ اتْحَكَّمْتِي اِفْـــرَغْ الْحْكَـامْ
سَاعْتْ الظُّلْمْ اتْفُوتْ وُ نَاسْهَا ايْغِيبُو

يقول الشيخ أنجار السلاوي في قصيدته:  نَا كَرْ لَحْسَانْ
لَيَّامْ اِلَى تَزْيَانْ
كَــاتَبْنِي بُنْيَـــانْ كَلْقْصَرْ
بَاَلــزَّاجْ الْفَتَّانْ
وَاَلنَّقْشْ عْلَى تَرْتِيبُ
لِيَّامْ اِلَى تَشْيَانْ
كَتَخْسَّفْ ضَيّْ اَلشَّمْسْ وَالْقْمَر
بَعْجَاجْ اُ دُخَّان
وَ نْجُومْ اللِّيلْ اِيغِيبُ

يقول سيدي عبد القادر العلمي في قصيدته:  اَلـــــــدَّارْ
أَصْحَبْتْ زَلاَغــِي فَلْسْ مَنْ لَقْوَارَطْ اَنْحَاسْ
خِيرْ مَنْ صَحَبْتْ شَرّْ اَلْخَلْقْ مَنْ اَبْنَادَمْ

يقول السي التهامي لمدغري في قصيدته:  فَارْحَا 1
مَنْ تَهْرَبْ مَنُّو زُوكًـْ فِيهْ اتْرِيعْ وُ تَرْتَاحْ
قَــــالُو نَاسْ اَلتَّفْصَاحْ
هَلْ اَلعْقُولْ اَلرَّجَّــــــاحَا
وَاللِّي تَكْبَرْ بِيهْ رَافْقُ بْموَدَّا وُمْسَامْحَا

يقول سيدي عبد القادر العلمي في قصيدته:  السَّاقِي
مَنْ لاَّ يَرْكَبْ نَاقَــا
هِرِيَّـــــا سَبَّاقَــــا
مَا يَرْبِي نَهْجْ الطْرُوقْ
مَنْ لاَّ يَمْلَكْ طَاقَــا
مَا يَبْرَا مَنْ فَاٌقَــا
وَلاَ يَتْدَنَّى الْسُــــــــوقْ
حَفْظْ اَلنَّظْمْ اعْيَاقَا
وَاكْيَاسَا وافْيَاقَــا
يُدْرَكْ بِهْ حُسْنْ الخْلُوقْ
وَالْمِيزَانْ احْدَاقَـــا
وَافْرَاسَا وَ الْبَاقَا
شَلاَّ يَدْرِيوْا لُوشُـــــوقْ

يقول الحاج أحمد لغرابلي في قصيدته:  الفجر
مَنْ لاَ يَرْفَعْ بَكْبَـارْ
لِيسْ اِرَفْعُوهْ اَصْغَـارُ

يقول الشيخ عباس بن بوستة في قصيدته:  السفرية
لِيسْ اَلْفَدّْ اَلْغَنْضُورْ
مَنْ اهْبَطْ مَنْ اَلسُّورْ
وَلاَّ كَشَّطْ جَمْهُورْ فَلْخْلاَ وُلْقْفَارْ
وَالتَّاقِي دَاكْ اَسَادِي
مَنْ يَتْقَى الله يْرَى اعْجَايْبْ بْلاَ اعْدَادْ

يقول  سيدي عبد القادر العلمي في قصيدته:  الصرخة
مَنْ لاَزَمْ اَلصّْبَرْ وَرْضَى لاَ بَدّْ لـُو ايْصِيبْ
وَالـِّي ابْغَا يْغِيضْ احْسُودُو
يَتْبَعْ بَلَمْهَلْ مَقْصُودُو
حَتَّى ايْنَكْمَلْ مَعْدُودُو
مَا نَالْ حَدّْ مُرَادْ
اِلاَّ ابْتَعْبْ وَاطْرَادْ

يقول الشيخ عبد العزيز المغراوي في قصيدته:احْمَامَتْ البْطَاحْ / جَمْعْ الْبَهْيَاتْ
خُوفِي يَجْفِيوْ مَرْسْمِي وِيغَدْرُو مَا فَالْجْفَا اصْلاَحْ
الْغْدَرْ افْعَايْلُ اقْبَاحْ
وَاشْ انْهِيَّ امْزِيَّتْ الْغَدَّارْ الْمَغْرُوقْ فَالْعْمَا

يقول الشيخ محمد بنعلي ولد أرزين في قصيدته:الكًـاموس / القلب
الْخِيرْ عَنْدْ نَـــــاسُو اِلاَّ تَسْلِيفْ
بِهْ اتْجُودْ اهَلْ لَحْسَانْ وُ اتْكَافِي

يقول الشيخ الحاج أحمد امريفق في بعض حكمه
اِلاَ مَا كُنْتِ طَامَعْ اَلْحَدْ فْمَــالُ
مَا تَخْضَعْ لِيهْ كَانْ نَمْلاَ وَلاَّ فِيلْ
قَالُو مَنْ عَبْرُو اَلْمَعْنَاتْ اُجَالُ
مَنْ تَطْمَعْ فِيهْ رَاكْ بِينْ اِدِيهْ دْلِيلْ
اُمَنْ تَغْنَى عْلِيهْ تَنْعَدّْ ابْحَـــالُ
رَفْعْ اَلْهَمَّا يْزِيدْ لَلْمَرْوْ اَلتَّجْلِــــيلْ

يقول  سيدي عبد القادر العلمي في قصيدته:  الدار
الْحْلاَوَا بَالْمَنَّا كَاتْدِيرْ لَمْـرَارْ
يَااَلطَّامَعْ فِي مْوَذَتْ مَنْ اَرْبَاوْ فَالْوِيلْ
لَمْغَطَّسْ فِي الْعُرَّا مَا يْزَوَّلْ الْعَارْ
وَالْمْوَتِي فَ الْعَلَّا مَا يْطَبْ لَعْلِيلْ

يقول الشيخ محمد بنعلي ولد أرزين في قصيدته:يَا الهاوِي تَهْوَى مَنْ لاَيْلِيهْ سَطْوَا
الْفُلْكْ اِدُورْ عَلَى اللِّي طَاعُو وَ اعْصَاوْ
مَا يَامَنْ فَالزّْمَانْ مَنْ غِيرْ الْمَغْوِي
اَمَا مَنْ قُومْ بِهْ ضَحْكُوا وَاتْسَــــــــلاَّوْ
وَاغْدَرْ بِهُمْ وَادْبَحْهُمْ بْلاَ جَنْــوِي

يقول الشيج الجيلالي امتيرد
ديرْ الـْخِيرْ فَاهـْلـُو وَ افـْغِيرْ اهـْلـُو
لاَ تـْحَافِي مـَرَوْ بـْجَهـْلـُو
لاَ غـْنـَا يـَنـْدَمْ عـَنْ فـَعـْلـُو
ابـْغِيرْ تـَحـْزَارْ

يقول السي التهامي لمدغري في قصيدته:  النـَّحْلَة
مَنْ يَمْشِي فَالضَّوّْ مَاعْثَرْ
وَالْغَادِي فَاَلظّْلاَمْ خِيلُو عَثَّارَا

يقول الشيخ محمد بنعلي ولد أرزين في قصيدته:  الوصاية الثالثة
اَلنـَّاسْ اَفْعـَالـْهـَا اتْخَبْرَكْ بِهَا وَ اخْتـَارْ لِكْ نُخْبَا
لـَفْعَالْ اَلطَّيْبَا افْطِيبْ الأَصَلْ يُوصَابُ

يقول الحاج أحمد امريفق في قصيدته:  رِيحْ فِي رِيحْ
قـَالـْتْ امْثُولْ اَجْلـَبـْنَهَا لْمَنْ اَصْغَاهَا
بَفْحـُولْ اَلطَّايْلاَتْ لَكْتـَافْ ايْسَخْنُ

يقول الشيج الجيلالي امتيرد في قصيدته:  الدَّاوِي
لاَاتْرَبِّي ذِيبْ اعْوَاوِي
وُ لاَ اتْعَاشَرْ بْغَلْ ازْوَاوِي
وُ لاَ تَرْفَعْ جَرْوْ عَنْ جَرْوَا

يقول  سيدي عبد القادر العلمي في قصيدته:  الصرخة
لُولاَ اغْزَالْ لـَقْفـَارْ
طـَبـْعُ اشـْرُودْ حـَدَّارْ
لـَوْ كـَانْ بـَارْ
وَ اَلرَّخـْصْ اعْلِيهْ امْعِيبـَا

يقول  سيدي عبد القادر العلمي في قصيدته:  الساقي
لاَ تـَسْتَكـْرَبْ مَنْ ادْنـُوبْ وَلاَ تـَتـْكـَلْ عَنْ ثـِيقَا
مـُولاَنـَا غـَانِي اشْفِيقْ

يقول  الشيخ عبد العزيز المغراوي في قصيدته:  صُونْ دينك
اَلزّْمـَـانْ وُ صَحـَّتْ لَبْـــــدَانْ
وَالْهـْوَى وَ اَلنَّفْسْ وَ اَلشِّيطَانْ
وَاَلنـّْسـَا وَ الْبْحَرْ وَ السُّلْطَانْ
لاَ تـْوَسَّدْ مَنْهُمْ اَمـَــــــــانْ

يقول  الشيخ محمد بنعلي المسفيوي في قصيدته:  اللطفية
اَلـْقـُولْ بـْغِيرْ اَفـْعـَالْ دَاكْ عـَجْبْ اَلـْعْجُوبْ
وَ اَلـْحِيطـْ بْغِيرْ اَلـْسـَاسْ لاَيْبَدُّ اِيرِيبْ

يقول  سيدي عبد القادر العلمي في قصيدته:  اَعَاشَقْ صُونْ اهْوَاكْ
سَاعَا عْلَى الرّْضَا تَكـْفِي لـَلـْمَغْرُومْ
لَوْ يدوَّزْ فـَالْهـَجْرْ احـْقـَابْ

يقول الشيخ الجيلالي امتيرد في قصيدته: فاطما شرع الله معاك
ضَرْعْ نـَاسْ الْجـُودْ مـَا غـَرْزْ مـَنْ حـْلِيبُو

يقول الشيخ الجيلالي امتيرد في قصيدته: الدواح
لاَ تْحَافِي خَاطِي بَخْطَاهْ
اَلطْعَامْ عْطِيهْ وُ تَرْكُو امْعَ نَكَّارُو
وَاجْمِيعْ مَنْ احْطَبْ شِي مَا تَسْخَنْ بِهْ اِلاَّ ذَاتُو

يقول الشيخ الجيلالي امتيرد في قصيدته:  البحر
مَنْ حَرْثْ اَلْبُهْتَانْ وَ الْكـْذُوبْ اَضْحـَا لـُو فَلاَّحُو
مـَا يـَرْفـَدْ مـَنْ كـًاعـْتـُو ازْرَعْ

يقول الشيخ الجيلالي امتيرد في قصيدته: الدواح
الغـَادَرْ يَنْغْدَرْ وَ الرَّاكـَلْ يَرْكـَالْ
اكـْمَا الزّْمـَانْ الوَاعَصْ يَفْعَلْ
وُالوُفـَا مَنْ الفْضـَالْ اِيحَلْ

يقول الشيخ محمد بنعلي ولد أرزين في قصيدته:الربيعية
وَاللـِّي نَصْرُ اللهْ اِينَتـْصـَرْ
وَ الطـَّالـَعْ فِي اسـْمَاهْ لاغـْنَى يَتـْوَارَا
اِيشـَاهْدُوهْ النَّاسْ بَلـْبْصـَارْ

يقول سيدي عبد القادر العلمي في قصيدته: الدار
مـْحـَالْ الضِّيقْ اَلـِّي تُرِيكْ طـَبْعْ لـَحْرَارْ
اتـْفـُوزْ بَحْبِيبَكْ  وَلِّي هُوَ اعْدُوكْ مَخـْبُورْ

يقول  سيدي عبد القادر العلمي في قصيدته: النهــــار
قـَالْ يَا نـَسِيدِي وَاللـِّي رَادْ لـَعْلـُو يَبْنِي لـَطـْلــُعـُو ادْرُوجْ

يقول الشيخ محمد بنعلي ولد أرزين في قصيدته:الجــــــافي
اَيــَّهْ وَافــْيـَا وَ لا لاَّ تــَكــْفِينـِي

يقول  سيدي عبد القادر العلمي في قصيدته: التائية
الـحْبِيبْ اَلا يَنْفـَعْنِي فـْيُومْ حَزَّاتْ
لا شْ انْحَمَّلْ عَنْ قـَلْبِي غَلّْ مَنْ كـَلـَفْتُو

يقول  سيدي عبد القادر العلمي في قصيدته:  الصرخة
عَزّْ السّْلوعْ عَنْدْ غْلاها
وْ تَهْوانْها يَّامْ رْخاها
وِيسَاوَمْ الْهْمَجْ مَشْراها

يقول  الشيخ أحمد الكُندوز في قصيدته:  المرسم
مَنْ  قَبَلْ اِيبَانْ الشـِّيبْ كـَانْ عَيْبِي بَاقِي مَسْتـُورْ
وَ اليُومْ اَتـَى عَجْلانْ عَنْ اعْدَارِي خـَيَّمْ سَتـَّارُ
وَكـْسَى لـُونْ القـَارْ

يقول  الحاج ادريس بنعلي في قصيدته: الربيعية 2
اَلكـْوَانْ ارْسَايَـــــلْ لـَجْمِيعْ مَنْ اتـْفـَكـَّرْ
كـُلّْ عَارَفْ يَوْجَدْ فَسْطـُورْهَا امْعَانِي
طـَابَتْ احْيَاتْ مَنْ ارْفَعْ لَغْطـَا وُ اعِتـْبَرْ
وُانـْتـْبَهْ لـَسَّرْ الـْمَجْعـُولْ فـَـالـْكـْوَانِي

يقول  الشيخ محمد النجار(المداح) في قصيدته:  جلّْ الصْلى مَهْدِيَّا
سُورْ الدَّعوَى مَا لـُو اَلـْسَاسْ لـُوْ يَتـْعـَلـَّا مَهْدُومْ

يقول السي التهامي لمدغري في قصيدته:  النـَّحْلَة
مَنْ لاَ جَرَّبْ حَالْ مَاعْدَرْ
وَلِّي جَرَّبْ مَاخْفَاتُ لِيشارَا

يقول الشيخ محمد  البوعمري
مَنْ ادْعَــــا بَالـْقُوَّى قـَالُ النـَّـاسْ يَنْحَدّْ
وِهْبَطـْ قـَدْرُ لـُو فـُــــوقْ الـْفـْلاكـْ يَصْعَدْ
مَنْ افـْتَحْ بَابْ ابْرَاسُ يَا سَمْعِينْ يَنـْسَدّْ
وُ الحْمَقْ مَنْ جَا لـَلـْحَيَّا وُطـَامَعْ الشـْهَدْ

يقول الشيخ الجيلالي امتيرد في قصيدته:  الباتول / الدربلة
كُتْمَانْ السَّرّْ فَلْحْشَا خَبِّيهْ
كَتْمُ وُلاَتْحَدَّتْ بِهْ
خَفْيَا اَخْفِيهْ
اَصْبَرْ لَلصَّدّْ وَالجّْفَا وَالتِّيهْ
صَبْرْ اَلْهْيَامْ

يقول  سيدي عبد القادر العلمي في قصيدته:  الصرخة
وللّي مْعَ الرّْضا باتْ
يَنْسا الجّْفا للِّي فاتْ
روحُ هْناتْ
ساعَتْ لَقْبولْ وْجيبا
وَالسَّرْ مَنْ كْماهْ
لاَ غْنى شُرْبُ يَصْفى مَاهْ

يقول الشيخ الجيلالي امتيرد في قصيدته:  الطير
وِلاَ عَمّْ الْقـْضـَا ارْحَمْتْ المُولَى تـَفْجِي ضِيقـْتُو

يقول  سيدي عبد القادر العلمي في قصيدته:  الغيبا
ايَا سِيدِي يَصْبَر لِعَلْتُو مَنْ لاَّ يَسْخَى لطْبِـِــيبْ
يَصْبَر للجْفَى و الهَجْرا
مَنْ لاّ اسْخَى بْدهبْ وَ فجرَا
دَغْيَا اتْخِيبْ فِيهْ النَّظْرَا
طَـبْع المْلِيحْ غَدَارْ
لا تَامْنُو الى زَارْ
خُــدْ الاخْــبــارْ من عَنْدِي بالتَجريبـَا
مَلْحْ الزِّينْ اجْفَاهْ
و البْهَا تِيهَانُو وتَاهْ

يتبع