قصيدة الْغَـــــَالْيَـــــــــا

للشيخ امحمد البوعَمْرِي                مبيت ثلاثي

القسم الأول
مَا شَافَتْ عِينِي اعْشِيقْ سَكْرَانْ ابْخَمْرْ الْحُبّْ وَالْهْوَى وَكْتَمْ سَرّْ الْحَالْ
وَشْرَابْ امْهَجْتُ الْفَانْيَا
مَنْ رَاسْ الْعِينْ وَرْدْ شَرْبَا مَخْفِييَّا

وَلْقَحْتْ ادْوَاحُ ابْطَّلْ عَشْقُ وَرْقَصْتْ مْعَ انْسِيمْ صُبْحْ الْعَطْفْ الْمِيَّالْ
وَطْيَارُ فَالْعَرْشْ دَاوْيَا
تَنْشَدْ وَتْبُوحْ بالْسْرَارْ الِمَكْمِييَّا

بَشْرَابْ الْمَحْبُوبْ غَابْ عَقْلُ وَرْقَصْ بِينْ الْمْلاَحْ تِيهْ وُ رَفْعَا وَدْلاَلْ
شُرْبْ اهْلْ الْهَمَّا الْعَالْيَا
وَزْهَارُ فِي اعْرَاشْ لَوْصَالْ ادْكِييَّا

مَا عَرْبَطْ بَهْوَاهْ شَاغَلْ الْفَكْرْ وُ مَحْبُوبُ ارْضَاهْ عَبْدْ افْسَايَرْ لَحْوَالْ
وَشْمُوسُ فَسْمَاهْ ضَاوْيَا
شَاهَدْ بِهَا اشْمُوسْ وَبْدُورْ ازْهِييَّا

فَحْضَرْتْ الْعُشَّاقْ كِيفْ شَاهَدتّْ اعْيُونْ اقْوَاسْهَا تْلُوحْ امْزَارَكًــْ وَنْبَالْ
وَحْوَاجَبْ وَعْيُونْ جَارْيَا
قُلْتْ الْمَنْ شَافْ عِينهَا شَارُ لِييَّا

الحربة
قُلْ الْتَاجْ الزِّينْ نُورْ شَمْسْ الْعُشَّاقْ الْقَايْلِينْ بَسْكَرْتْ الْحُبّْ احْلاَلْ
فَطْرِيقْ الْعَدْرَى الْغَالْيَا
مَنْ عَشْقْ ابْهَاكْ زَادْ رَفْعَا وَمْزِييَّا

القسم الثاني
سارحة

فَمْقَامْ التَّفْضِيلْ
حُسْنْ ابْدِيعْ اجْمِيلْ
تَمْثِيلْ وُ تَخْييِيلْ
شَاهَدْ الْبَعْضْ اخْيَالُ

مَحْبُوبَكْ لَخْبِيلْ
نَالْ امْقَامْ اجْلِيلْ
وَدْرَكْ حَظّْ اجْزِيلْ
بِكْ وَنْتَجْتْ احْوَالُ

مَا يَتْعَبْ فَسْبِيلْ
مَنْ جَدْبُ لَخْلِيلْ
وَاسْقَاهْ اسْلَسْبِيلْ
عِينْ قُرْبُ وَوْصَالُ

بَنْشَوْتَكْ سَكْرَانْ كُلّْ مَحْبُوبْ انْتَرْ عَقْدْ لَفْرَاقْ وَنْضْمُ لُبَّتْ لَوْصَالْ
بَدْرَارْ انْفِيسَا وُ غَالْيَا
        بَزْهَرْتْ ارْوَاحْ مَنْ احْصَنْهَا مَشْرِييَّا

فِيكْ انْظَرْتْ اسْرَارْ ضَمّْهَا صُورْ ابْهَاكْ اخْفِيتْهَا عْلَى الْوَاشِي وَالْعَدَّالْ
بَنْفَاسَكْ لَفْكَارْ سَارْيَا
فَطْرِيقْ اخْفَاتْ عَنْ اعْيَانْ الْبَحْرِييَّا

شَفْتَ ابْعِينَكْ نُورْ فَالطّْرِيقْ ارْسَمْ لِي مَا كُنْتْ رِيتْ قَبْلْ التَّعْيـِينْ اخْيَالْ
وَغْصُونِي بَنْدَاكْ رَاوْيَا
وَدْرَارْ الْقَلْبْ فِي اعْقُودَكْ مَحْضِييَّا

لَهْلَ الْعَشْقْ اظْهَرْتْ مَا اضْمَرْتْ افْغِيرَكْ يَدْرِيهْ مَنْ اْدْرَاكْ اُ شَاهَدْ لَكْمَالْ
شَافْ ابْنُورْ اعْيُونْ رَاضْيَا
وَحْوَالُ فِي اسْبِيلْ عَشْقُ مَرْضِييَّا

بِكْ ابْدُورْ الزِّينْ ضَاوْيَا وَشْمُوسْ الْعُشَّاقْ مَنْ اعْيُونْ ابْهَاكْ الَغَزَالْ
بِكْ اسْكَرْتْ الْحُبّْ صَافْيَا
وَسْكَرْتْ الْحَاضْرِينْ وَالشُّرْبْ انْتِييَّا

الحربة
قُلْ الْتَاجْ الزِّينْ نُورْ شَمْسْ الْعُشَّاقْ الْقَايْلِينْ بَسْكَرْتْ الْحُبّْ احْلاَلْ
فَطْرِيقْ الْعَدْرَى الْغَالْيَا
مَنْ عَشْقْ ابْهَاكْ زَادْ رَفْعَا وَمْزِييَّا

القسم الثالث
سارحة
حُسْنَكْ جَرّْ الدِّيلْ
تِيهْ اُ عَطْفْ وُ مِيلْ
تِيهْ اعْشِيقْ اتْمِيلْ
عَرْبَطْ ابْحُبْ اغْزَالُ

مَا يَدْرِيهْ اجْفِيلْ
وَلاَ قَلْبْ اغْفِيلْ
تَعْظِيمْ وُ تَبْجِيلْ
زِينْ حَاجَبْ فَكْمَالُ

نَيْلَكْ لَهْلَ النِّيلْ
مَنْ سَبْحُ فَالنِّيلْ
وَهْدَاوْ بْلاَ كِيلْ
خَالَصْ الْوَدّْ وُ نَالُ

مَنْ لاَ هَابْ النَّفْسْ مَا اضْفَرْ بَنْفَايَسْ وَنَا اهْدِيتْ جُوهَرْ عَقْدِي وَالْمَالْ
شَفْتْ ابْهَاكْ افْكُلّْ نَاحْيَا
بَايَعْتْ التَّاجْ هِيبْتُ قَهْرْ اعْلِييَّا

قَبْلِينِي مَمْلُوكْ فِي احْيَاتَكْ نَفْخُرْ بِينْ لَعْبِيدْ وَالْخَدّْ احْضَرْتَكْ خَالْ
نَغْنَمْ بِكْ اوْقَاتْ زَاهْيَا
غُرَّا فَجْبِينْ هَلْ الْعَشْقْ الْعَدْرِييَّا

مَيَّلْ نَاسْ الْحَالْ مِيلْ عَطْفَكْ وَنْسِيمْ الطِّيبْ مَنْ ازْهَرْكْ الْمَنْ شَمُّ فَالْ
وَعْيُونَكْ بَنْدَاكْ جَارْيَا
وَنَا عَيْنِي ابْسِيلْ حُبَّكْ مَجْرِييَّا

ادْوَاحِي فَرْيَاضْ صُولْتَكْ وَشْوَارَدْ وَجْوَارْ بَايْعُوكْ اِيمِينَا وَشْمَالْ
فُوقْ اسْرِيرْ الْمَجْدْ سَالْيَا
عَدْرَا فَحْجَابْ ظَلّْ عَرْشَكْ حَضْرِييَّا

ونَيَا مَكْسِي بْتُوبْ عَشْقَكْ وَشْرَابِي مَنْ ابْرِيقْ شُوقَكْ وَالْقُوتْ اوْصَالْ
حُرْمَتْ مَنْ سَمَّاكْ غَالْيَا
وَصْلِ قَطْعِ وُ لُبّْتِي لِيكْ اهْدِييَّا

الخربة
قُلْ الْتَاجْ الزِّينْ نُورْ شَمْسْ الْعُشَّاقْ الْقَايْلِينْ بَسْكَرْتْ الْحُبّْ احْلاَلْ
فَطْرِيقْ الْعَدْرَى الْغَالْيَا
مَنْ عَشْقْ ابْهَاكْ زَادْ رَفْعَا وَمْزِييَّا

القسم الرابع
سارحة
بِكْ افْخُرْ ذَ الْجِيلْ
وَنْشَدْ رَصْدْ الدِّيلْ
لَرْبَابْ التَّدْيِيلْ
شَارْ وَعْرَبْ عَنْ حَالُ

ابْرَى كُلّْ اعْلِيلْ
وَالَعْ بِيكْ ادْهِيلْ
تَكْمِيلْ وُ تَخْوِيلْ
حَاجَبْ السَّرّْ وُ مَالُ

شَارْ ابْطَرْفْ اكْحِيلْ
لَرْيَامْ التَّخْلِيلْ
تَرْقَصْ بَالتَّهْلِيلْ
وَالرّْقِيبْ افْخُلْخَالُ

مَا رَاقَبْ فَجْرُ فْلِيلْ شَعِرَكْ وَنْظَرْ فَجْبِينَكْ الْبَدْرْ وَ الشَّمْسْ وُ لَهْلاَلْ
مَا سَلّْ اسْيُوفْ الْمْشَالْيَا
مَنْ غَمْدْ احْوَاجَبْ الْعْيُونْ الصَّرْدِييَّا

مَا شَافْ الْجَلاَّرْ فِي اخْدِيَّدْ فُوقُ تَدْهِيبْ مَنْ اشْمُوسْ اعْيُونَكْ وَالْخَالْ
وَشْفَارْ النَّجْلاَ السَّهْيَا
وَاقْوَاسْ اتْلُوحْ سَمّْ حَرْبَا مَسْقِييَّا

مَا حَامَتْ بِيزَانْ عَنْ اقْلِيبُ وَخْطَفْتْ اطْيَارْ مُهْجْتُ مَا شَمَّرْ بَخْلاَلْ
دَيْلُ فَالْحَضْرَ الْبَاهْيَا
وَسْكَرْ بَمْدَامْ رِيقْ شَفَّا عَسْلِييَّا

مَا طَوَّقْ لَجْيَادْ مَنْ اجْوَاهَرْ ثَغْرَكْ وَفْكَارْ مَنْ احْضَرْ وَعْدَلْ بِكْ وُ مَالْ
مَا شَافَكْ فَحْلُولْ وَافْيَا
بِينْ ابْدُورْ الْمْلاَحْ وَالشَّمْعْ اتْرِييَّا

مَا شَمَّرْ بَحْمَايْلْ الْفْخُرْ دَرْعِينَكْ وَسْقَا اهْلَ الْحْضَرْ بَكْيُوسْ الْجَرْيَالْ
مَا غَلْغَلْ بَقْدَاحْ مَالْيَا
مَا دَارْتْ فِي احْضَرْتْ عَشْقُ حُمِييَّا

الحربة
قُلْ الْتَاجْ الزِّينْ نُورْ شَمْسْ الْعُشَّاقْ الْقَايْلِينْ بَسْكَرْتْ الْحُبّْ احْلاَلْ
فَطْرِيقْ الْعَدْرَى الْغَالْيَا
مَنْ عَشْقْ ابْهَاكْ زَادْ رَفْعَا وَمْزِييَّا

القسم الخامس
سارحة
مَا سَلْسَلْ لَعْقِيلْ
بَسْلُوكْ افْتَخبِيلْ
فِي بُسْتَانْ احْفِيلْ
مَا حْجَبْ صُورْ اكَدَالُ

مَا شَاهَدْ تَكْلِيلْ
تَاجْ الْحُسْنْ اشْعِيلْ
وَغْمَدْ سِيفْ اصْقِيلْ
فِي اضْمَايَرْ عَدَّالُ

مَا وَجَّهْ تَعْلِيلْ
        لَرْبَابْ التَّعْلِيلْ
وَشْرَحْ صَدْرْ اغْلِيلْ
خَمَّرْ الْعَشْقْ ادْخَالُ

مَا قَرَّرْ عَشْقُ فْلُوحْ صَدْرَكْ وَجْنَا تَفَّاحْ مَنْ اغْصَنْ مَا لَحْقُوهْ اطْفَالْ
وَبْطَنْ حَجْبْ اسْرَارْ خَافْيَا
وَالسُّرَّا خَاتَمُ بْطَابَعْ دَهْبِييَّا

مَا شَافْ السِّيقَانْ وَالْفْخَادْ افْلَجَّتْ عَشْقُ امْشَرْغْنَا تَزْلَغْ بَالْكُمَّالْ
فِي بَحْرْ اهْلَ الدُّوْقْ جَافْيَا
تِيَّهْتْ اقْرَاصَنْ الِفْحُولْ الصُّوفِييَّا

مَا تَاهْتْ لَرْدَافْ فِي اقْلِيبُ يَوْمْ اعْطَفْتْ الْقْدَامْ وَرْقَصْتْ امْعَ الْخُلْخَالْ
وَتْمَايَحْتْ اقْدُومْ سَامْيَا
وَضْحَكْ ثَغْرْ الْفْرَاحْ بُشْرَى وَهْنِييَّا

مَالُوَّحْ شَمْعْ الْكْمَالْ فَبْسَاطْ الْخَتْمْ اعْلَى اسْرُورْ نَاسْ الْبَهْجَا الْفْضَالْ
وَقْلَبْ عِينْ افْكَارْ سَاهْيَا
بَنْفَحْتْ ازْهَارْ طِيبْ عَطْفَكْ تَهْنِييَّا

مَا رَفْعْ اسْنَادُ كْمَا ارْفَعْتْ الْمَقْصُودْ الْرَافْعْ السّْمَا لَجْلِيلْ الْفَعَّالْ
بَسْتَارْ الْفَرْقَا النَّاجْيَا
يَسْتَرْ حَالْ الْعْبَادْ عَالَمْ لَخفِييَّا

الحربة
قُلْ الْتَاجْ الزِّينْ نُورْ شَمْسْ الْعُشَّاقْ الْقَايْلِينْ بَسْكَرْتْ الْحُبّْ احْلاَلْ

فَطْرِيقْ الْعَدْرَى الْغَالْيَا        مَنْ عَشْقْ ابْهَاكْ زَادْ رَفْعَا وَمْزِييَّا