قصيدة هَشُومَا
للشيخ الجيلالي امتيرد        مبيت ثلاثي

الحربة
غَدَّرْ كَاسِي هَـاتْ نُوبْتِي يَاسَقِي وَسْقِ اَلْبَهْيَاتْ زِينَتْ نَقْطْ اَلْخَالْ
لاَ تَغْفَلْ عَنْ رَايَتْ اَلنّْــصَرْ
مَصْبَاحْ اَلْوَلْعَاتْ وَلْفِي هَشُّومَـا

القسم الأول
اَمَحْلاَ لَرْيَامْ لِيلْتْ يْكُونُ فِي حَضْرَا اِيكًـَبّْحُ عَلْ لِيمَنْ وَشْمَــالْ
تَتْبَهَــا وَتْزِيدْ فَـاَلنّْضَرْ
وَتْجَدَّدْ لِيعْتْ اَلْقْلُوبْ اَلْمَكْلُومَـــا

دِي تَفْخَرْ عَنْ دِيكْ بَارْزَاتْ اَفْحُلاَّتْ اَدْبَاجْ رَيْقَـا تَشْجَـارْ وُتَكْلاَلْ
بَلْهِيبَا وَهْيَــاجْتْ اَلصّْغُرْ
وَاَلنَّغْمْ اَلدَّاوْدِي سْرِيعَــا مَنغُومَا

مَنْ لاَلُ كَبْدَا قَـاسْحَـــا مَـــا شَاهَدْهُمْ مَـا دَا لْهُمْ اِيمَارَا مُحَــالْ
اَشْ يْعِيـــدْ قْلِيـلْ اَلصّْبَــــــــــرْ
قَلْبُ هَنَّـــاهْ مَــا نْلُومُوهْ اَبْلُومَــا

مَعْظَمْهَا فَرْجَـــا اَغْنَمْتْهَا تَدَّاوَلْ بِهَــا اَلْسُونْ لَهْوَ مَا طَلْ اَلْحَالْ
شَلاَّ مَـــا نَحْكِي اَقْــــــــوَى اَكْثَرْ
فَرْجَــا مَنّْهَا ضْحَاتْ لَوْشَـا مَحْرُومَــا

القسم الثاني
هَلَّــــــلْ بَــــلْعْرَاقِـــــي
مَنْ كَــاسْ اَلْعْرَاقِـــــي
حَتَّى يَـــــاَلسَّاقِي
اَتْرَى نْغِيــــبُ وَ نْفِيــــقُ

هِيَّجْتِي اَشْوَاقِـــي
وعْتَمْــــــرُ اَسْوَاقِــــــــــــــــي
مَــــا مَثْلَكْ رَاقِي
يَــاَلصَّايَلْ بَرْحِـــــــــــيقُ

شُفْ اَلِّيلْ بَـاقِــي
سَهْدَكْ عَنْ فْيَـاقِي
عَطْفْ عْلَى رْفَـاقِي
اَعْطُوفْ صَادَقْ لَصْدِيقُ

وَكًـَضْ لَلصَّفْرَا اَبْطَالْهَا وَاشْ اَمْنْ اَمْنَامْ اِيحْلا لْمَنْ زَرُوهْ اَبْلُوصَـالْ
كُبّْ اُدَوَّرْ طَـــاسْتْ اَلْخْمَرْ
فَاجِي فَاجِي عْلَى اَلْقْلُوبْ اَلْمَكْلُومَــا

لاَ لَدَّا مَنْ دُونْ اَلنّْسَــا جَعْلْ اللهْ اَكْلاَمْهُمْ يَسْرِ فَلْقَلْبْ اَمْصَــالْ
مَنْ لاَ يَهْوَاهُـــــمْ يَنْعْـــــــدَرْ
عَايَشْ وَمْعِيشْتُ مْعِيشَــــا مَدْمُومَـا

طُفْ عْلَى اَلْحَضْـرَا بْكَسْهَا شَمَّرْ دِيلَكْ يَــانْدِيمْ رَاقَبْ لِيلَكْ مَزَالْ
لِيلَتْ لُوصَـــــالْ لِيلَتْ اَلسّْهَرْ
بَكًـْـرَايَحْهَا اَلْنَـــاسْ لَهْوَى مَعْلُومَـــا

شُفْ اَبْنَـــاتْ اَلْحَيّْ كَاكْوَاكَبْ تَخْطَفْ ضَيّْ اَلْبْصَارْ بَمْحَاسَنْهَا وَجْمَالْ
حُـــزْ اَحْبِيبَكْ حُــزّْ لَلصّْدَرْ
حُوزَتْ لَكْرَامْ لِيلْتْ تَمْسَـا مَكْرُومَـا

القسم الثالث
طَابْ اَشْرَابْ كَاسِـــي
بُجُودْ لَعْنَـــاسِي
وَحْبَابِي وُ نَـــاسِي
اَجْمِيعْ بَلْـــوَجْدْ يْمِيسُ

مَصْبَـاحْ اَلْغْلاَسِي
دَاحَتْ عَنْ سْيَــاسِي
وَضْحَكْتْ لَوْنَــاسِي
اَزْهَارْهَـــا قَبْلْ يْبِيسُ

رَتْخَـــا كُلّْ كًاسِي
وَدْهَبْ شَرّْ بَــاسِي
نْصَابَحْ وَنْمَــاسِي
اَلْكُلّْ سَلْوَانْ اَعْـــرِيسُ

مَا بَعْدْ اَلسَّلْوَا هْنَا وَلاَبَعْدْ اَلزِّينْ فْــرَاحْ فَرْجْتُ مَا يَفْدِيهَا مَـالْ
بِهْ اَلْعَقْلْ اِغِيبْ وِيحْـضَرْ
وَاَلْقَلْبْ يْبُوحْ بَلْسْرَارْ اَلْمَكْتُومَــا

خَضْعْ اَلْطَاعَتْهُمْ يَالسَّاقِي وَالْغَالَبْ لِهْ مَا طْلَبْ قَالْتْ نَاسْ الْحَــالْ
بِهَا غُلْبْ اَرْجَـالْهَـــا قْهَرْ
                تَظْلَمْ وِيلاَ اَشْكَاتْ تَرْجَعْ مَظْلُومَــــــــــــــــا

صَارْ اَلسَّاقِي بَلْهْوَا يْهَــادِي حَتَّى وَلاَّتْ كَاتْنَادِي بَلْسَانْ الْحَالْ
طَارْ اَحْيَاهَا مَــا بْقَـا وْقَرْ
تَرْقَصْ وَتْشِيرْ بَلْكْمَامْ اَلْمَرْكَــُومَـا

كُلّْ اَوْنِيسْ مْعَ وْنِيسْتُ مَبْشُورِينْ اَمْخَمّْرِينْ عَزّْ اُ رَفْعَا وَكْمَـالْ
لاَهَجْــرَا لاَتِيـــهْ لاَنْــفَرْ
لاَ قَلْبْ اَنْكِيدْ لاَجْوَارَحْ مَهْمُومَــا

القسم الرابع
لِيلَتْنَــا اَفْرِيـــدَا
مَـا يَلْهَــا اعْنِيدَا
مَبْرُوكَــا سْعِيـــدَا
اعْلَى الرّْضَى كِيفْ انْرِيــدُ

لَمْحَبَّـــا جْدِيــدَا
وَالْكَلْمَــا نْفِيــدَا
والْعَدْيَــا بْعِيــدَا
طِيرْهَـا فُوقْ جْرِيــدُ

دِكْ اَلْدِي نْشِيــدَا
بَمْعَــانِي الْدِيــدَا
وَقْوَافِـــي شْهِيـــدَا
ابْصَحّْ  لَقْــوَالْ اِيفِيــدُ

كُبّْ اُ زِيدْ مْلاَ وُهَاكْ وَرَا يَسَـاقِي مَنْ امْدَامْنَا لاَ تَصْحَبْ طَمْطَالْ
رَاحْ الِّيلْ وُعَلّْــمْ الْفْجَــرْ
وَنْظَرْ لَعْسَاكَرْ الدّْحَامَسْ مَهْزُومَــا

صَبْحْ اصْبَاحْ انْهَارْنَا وُجَدّْدْنَا لِهْ اسْرُورْ مَالْهَا عَلَّوْصَافْ امْثَـالْ
لِيسْ ادْرَكْهَـا قِيسْ فَلْعْمَـــــــرْ
فَزْنَا وَسْطَابْنَـا افْرَايَجْ مَنْغُومَـــا

نَادَاهَـا طِيرْ الَفْرَاقْ بَلْعَزْمْ يْنَادِي مَا بْقَا امْكًـَامْ الرَّاحَلْ يَحْتَـالْ
وَدْمُوعْ الَعُشَّـاقْ تَنْهْمَــرْ
صَبْرِ عَنّْهُمْ كَــنْصْبَرْ الْمَفْطُومَــا

وَدَّعْتْ السَّاقِي وُسَـارْ وَالْقَوْمْ اتْكَايْدْ فِي جْرَاحْ سِيفْ الْبِينْ الْقَتَّــالْ
رَاحُ كَا غُــزْلاَنْ لَلْوَكَــرْ
كُلّْ اخْلِيلاَ مْشَــاتْ كًبّْلَتْ الْحُومَـا

القسم الخامس
اَحَفَّــاضْ وَافِي
اُ تْبَهَـــــــــــا وْصَـافِي
مَا نَا بِهْ خَـــافِي
عْلَى تّْحَـافْ وُ تَشْفِيفُ

سَرِّ سَرّْ خَـافِي
نَهْرِي ادْفِيقْ صَافِي
مَتْوَضَّحْ صَافِي
لَدّْ عَذْبُ لَرْشِيــفُ

مَا يَلْغِي اتْحَافِي
اِلاَّ وَغْــدْ كًـَـافِي
سُمِي سُومْ جَافِي
ارْيَاضْ بَنْوَارْ اقْطِيــفُ

الجِّيلاَلِي مَا دْخَلْتْ عُمْرِ لَشْبُوكْ وُ لاَ قْبَحْتْ بَقْبَاحْتْ هَلْ لَسْفَـالْ
صَحّْ الْقَوْلْ اِعِيـدْ الْخْبَرْ
وَقْلُوبْ الْخِيرْ لَسّْعَادَا مَلْهُومَـا

وَالْجَاهَلْ يَكْفِيهْ غَلّْ جَهْلُ وَالْجَـاحَدْ لَجّْحِيمْ وَالنَّاكُرْ لِيسْ يْنَالْ
صُنْعْ اللهْ الْمَالَكْ الْكْبَر
مَنْ وَدَّعْهَا كْمَا نّْسَامْ الْمَنْسُومَــا

وَنْهَيَتْ لَكْلاَمْ قَالْ عَاشَقْ لَرْيَـامْ اَلاَّ يْلُ فْعَشْقْ اهْوَاهُمْ تَبْــدَالْ
مَنْ صُغْرِ وَنَـا عْلَى السّْقَرْ
خِيلِي وَخْيُولْهُمْ دايَمْ مَلْجُومَــا

وَسْلاَمْ الْمُولَى عْلَى الْشْرَافْ اُ طَلْبَا وَعْدَادْ كُلّْ مَا خَايَلْ كَلّْ اخْيَـالْ
وَمَــا فَـاحْ الْوَرْدْ وَالزّْهَرْ
مَا دَامْ السَّرْ فَلْجْبَاحْ الْمَنْعُومَــا