قْصِيدَة اَلطِّيرْ
للشيج الجيلالي امتيرد         مبيت ثلاثي

القسم الأول
نَلْفَضْ بَغْرَايْبِي وُعَجْبِي نَخْبَرْ مَنْ لايْلُ اخْبَارْ
كِيفْ اجْرَالِي وُكِيفْ صَارْ
شَرْحْ امَعْنَا لْمَنْ اصْغَى لِي حَضَّرْ عَقْلُ وُنِيّْتُ

طَرْشُونْ اعْزِيزْ كَانْ عَنْدِ رَبِّيتُ سَاجَعْ لْطْيَارْ
مَدُّوَبْ امْوَالَفْ الْوْكَارْ
وَاليُومْ امْشَى وُغَابْ كِيفْ ايْغِيبْ اعْلَى الحِيّْ مِيّْْتُ

اشْ ابْقَى مَنْ امْكَـَامْ قُلْتْ انْفَتَّشْ افْبَهْجْتْ السّْرَارْ
بِينْ الْحُومَاتْ وَالْجْدَارْ
سُولانْ البِيبْ شِيخْ نَاجَمْ زُوَّاقْ احْضَى اشْجِيّْتُ

الحربة
طِيرْ امْشَى لِي وُلاعْرَفْتُ فِينْ امْشَى صَابَغْ لْشْفَارْ
فَدْفَدْ بَجْنَاوْحُ وُطَارْ
تَلْقِينِي بِهْ يَالْمُولَى طَالَتْ بَالْوَحْشُ غِيبْتُ

القسم الثاني
سارحا
سُوَّلْتْ اهْلْ الرّْيَاضْ جَمْلا
لامَنْ شَافْ مَنْ الْفْضَالْ

وَتْنِيتْ عْلَى الجّْنَانْ مَهْلا
بَرْيَاحْ امْحَبّْتِي انْسَـالْ

قَاصَدْ بَابَايْلانْ قَبـْــلا
قَالُ مَا قَالَتْ الْمْتـَـالْ

اخْرَجْتْ كْمَا يَخْرَجْ سَهْمْ امْكَلَّفْ مَزْعُوجْ مَنْ اوْتَارْ
ابْقَلْبْ اقْسَى مَنْ الْحْجَارْ
سُوَّلْتْ احْبَّابْ دَرْبْ ضَبَاِشي عَنْ تَوْصَافْ صُورْتُ

مَنْ ْبنْ صَالَحْ لَزْبَزْطْ وَ الْبِينْ اخْلافِي صَاحَبْ الكْدَارْ
وَالنَّادِ سَرّْ وَ الْجْهَارْ
هَدَا حَالْ الْغْرَامْ وَكْتَرْ مَنْ دَا فَعْلُ وُسِيرْتُ

الْبَنْ نَاهِيضْ عَنْدْ دُوكْ البِيتَاتْ انْجَايَبْ الْخْيَارْ
وَنْسَقْصِي جَاْر بَعْدْ جَارْ
حَيْرَانْ اعْلَى الْقْضَا انْرَجّْدَدْ كَاقْصُورْ عَلْ لْبِيّْتُ

الحربة
طِيرْ امْشَى لِي وُلاعْرَفْتُ فِينْ امْشَى صَابَغْ لْشْفَارْ
فَدْفَدْ بَجْنَاوْحُ وُطَارْ
تَلْقِينِي بِهْ يَالْمُولَى طَالَتْ بَالْوَحْشُ غِيبْتُ

القسم الثالث
سارحا
الْتِيشْنْبَاشَتْ سَرْتْ سَايَرْ
سَاعَ عَنْدِ فْعَوْضْ صُولْ

مَنْ المُوقفْ لَسْول غَايَرْ
وَنْفَتَّشْ عَرْضْهَا وُطُولْ

التَلْتْ افْحُولْ سَرْتْ زَايَرْ
تَبَّاعْ الْهَاشْمِي الرّْسُولْ

الَّمَّاسِينْ رَحْتْ عِيَّانْ امْكَاضِي فَاَرَغْ الْعْضَارْ
مَنْ حَرّْاشْدَايَدْ الْفْكَارْ
وَحْكِيتْ الْهُمْ مَا حْكَى جَابَرْ  قَبْلِي عَنْ اقْصِيّْتُ

قَالُلِي هَا فْرَاكْ لَطْيَارْ انْضَرْ يَا شِيخْنَا احْتَارْ
تَفْجِي لَهْمُومْ وَ الْكْدَارْ
رَايَسْ لَطْيَارْ قُلْتْ لِهُمْ مَنْ يَضْحَى لِي اخْلِيفْتُ

فِي حَقّْ اللهْ وَدّْعُونِي مَابَاِقي عَنْدْكُمْ عَارْ
اسْبَقْ مَاسَبْقْ فَلْسْطَارْ
اللهْ ايْصَرَّفْ ابْرَفْقَا وِيْبَرَّدْ نَاْر لِيعْتُ

الحربة
طِيرْ امْشَى لِي وُلاعْرَفْتُ فِينْ امْشَى صَابَغْ لْشْفَارْ
فَدْفَدْ بَجْنَاوْحُ وُطَارْ
تَلْقِينِي بِهْ يَالْمُولَى طَالَتْ بَالْوَحْشُ غِيبْتُ

القسم الرابع
سارحا
الْجِيرَانِي اقْصَدْتّْ عَازَمْ
سُكَّانْ امْنَازَهْ القْصُورْ

اجْوَادْ الْعَرْبْ وَ الْمْكَارَمْ
قَالُ لِي لامَتْ الْبْدُورْ

للْغَزْوَانِي زِدْ قَـــادَمْ
وَقْرَالْ فَاتْحَا وُزُورْ

زَرْتُ وَشْكِيتْ لُ ابْمَافِي قَلْبِي مَنْ لِيعَتْ الْغْيَارْ
بَحْضُورْ الْقَلْبْ وَ الْسْيَارْ
وَنْتِيتْ عْلَى الْمسِيدْ مَنْ قَالْ اكْوِيتْ عَدِّيتْ كِيّْتُ

خَبَّلْ رِيحْ الْهْوَا امْزاجِي تَخْبِيلْ احْدَايَقْ الْشْجَارْ
شَعْلَتْ بِينْ الضّْلُوعْ نَارْ
شَلا نَطْفِي وُلا انْبَرَّدْ مَانَفْعَتْ حَدّْ حِيلْتُ

الحربة
طِيرْ امْشَى لِي وُلاعْرَفْتُ فِينْ امْشَى صَابَغْ لْشْفَارْ
فَدْفَدْ بَجْنَاوْحُ وُطَارْ
تَلْقِينِي بِهْ يَالْمُولَى طَالَتْ بَالْوَحْشُ غِيبْتُ

القسم الخامس
سارحا
سَوَّلْتْ اعْلِيهْ كُلّْ مَاجَــدْ
لامَنْ بِيمَايْرُ ايْفِيــــدْ

نَاحَلْ فَانِي اسْقِيمْ نَاكَــدْ
وَبْقِيتْ كْمَا قْضَى لَوْحِيدْ

لَهْلْ ارِْيَاضْ الْعْرُوسْ قَاصَدْ
بَغْرَايَبْ كَـُرْحْتِي انْمِيـدْ

لامَنْ شَافُ يْشَرْحْنِي بَحْدِيتُ وِيْعَالَجْ الْضْرَارْ
اعْلاجْ الْبِيدْ بَالْمْطَارّْ
مَقْتُولْ الْحُبّْ وَ الْهْوَ لاطَالَبْ يَطْلَبْ دِيّْتُ

الْبَنْ اسْلِيمَانْ زَدتّْ نَلْقَاهُمْ بِينْ امْحَافَلْ الْصْوَارْ
دُوحَاتْ  اقْلايَدُ الْزْهَارْ
بَعْدْ امَّازَرْتْ سَلْتْهُمْ انَتْهَتْ بِيَّ اسْمِيّْتُ

قَالُ لِي رَبّْنَا ايْلاكَـِي بُوْصُولْ امْهِيَّجْ الْفْكَارْ
عَرَّاضْ اتْلُولْ وَ الْقْفَارْ
وِيلاعَمّْ الْقْضَى ارْحَمْتْ الْمُولَى تَفْجِي ضِيقْتُ

الحربة
طِيرْ امْشَى لِي وُلاعْرَفْتُ فِينْ امْشَى صَابَغْ لْشْفَارْ
فَدْفَدْ بَجْنَاوْحُ وُطَارْ
تَلْقِينِي بِهْ يَالْمُولَى طَالَتْ بَالْوَحْشُ غِيبْتُ

القسم السادس
سارحا
رَكَّـَبْتْ لَزَّاوْيَا ازْهِيَّا
وَالنَّادِ رَبّْنَا الْكْرِيـــمْ

نَلْقَى رَاجَلْ كَاْن لِيَّا
فَاتْ امْنْ اعْشَايْر اقْدِيْم

وَقْبَطْ بِيدِ وُسَارْ ِبيَّا
وَنْطَقْ لِي قَالْ يَافْهِيــمْ

مَالَكْ وَاشْنُواسْبَابْ لُونَكْ فَانِي يَدْبَالْ وِيْصْفَارْ
وَسْقَامْ اسْنَاكْ بِهْ دَارْ
وَدْوِيتْ وُقَلْتْلُ الْحُبّسْ كِيْصَبَّحْ حَالِي ايْبِيت

الطِّيرْ الِّي اتْعَرْفْ عَنْدِ وَاشْ افْحَضْرَا مْنْ النّْضَارْ
وَيَلاتَاهْ فَلْفْطَارْ
ويلامَاتْ رَبّْبَايَغْفَرْ سِيَّتْنَا وُسِيّْتُ

هَاهُوَ قَالِّي فْلَمْدَرْسَا طَالَبْ حَافَضْ الْسْوَارْ
يَتْبَاهَا تُوكَتْ الْقْمَارْ
مِيمِينْ وُحَاوُدَالْ نُوضَعْ لَهْلْ الْمَعْنَا سْمِيّْتُ

الحربة
طِيرْ امْشَى لِي وُلاعْرَفْتُ فِينْ امْشَى صَابَغْ لْشْفَارْ
فَدْفَدْ بَجْنَاوْحُ وُطَارْ
تَلْقِينِي بِهْ يَالْمُولَى طَالَتْ بَالْوَحْشُ غِيبْتُ

القسم السابع
سارحا
زَدْتْ الْقِليتُ كْمَا احْكَى لِي
سَلَّمْتْ اعْلِيهْ يَا كْرَامْ

قُلْتْ التَّاجْ الْبْهَا الْغَالِــــي
مَالَكْ يَانَاكَرْ الطّْعَـامْ

انْتَ لَزْهُوكْ بِهْ سَالِــــي
وَنَالَتَّعْبْ وَالسّْقَــامْ

غِيرْ الْحَرَّازْ قَالْ لِي وَالْحَاضِي بِهْ الْحْكَامْ جَارْ
عَفْرِيتْ ايْحَرَّقْ الْشْجَارْ
مَاتُوجَدْ يَا حْبِيبْ قَلْبِي عَنْدْ الطَّلْبَا اعْزِيمْتُ

قُلْتْ السُونْ الْشْيَاخْ لَطَّعْنْ امْضَامَنْ صَارَمْ السّْقَارْ
يَقْطَعْ مَنْ صَادْفُ اشْطَارْ
وَعْلَى جَمْعْ الْشْيَاتْ بِهْ الظَّالَمْ تَرْقَاشْ حِيّْتُ

قَالْ افْصِيحْ الْغَا جِيمْ وُلامَيْنِ رَايَسْ الْحْبَارْ
مَابِينْ اهْيَاكَلْ النّْضَارْ
طَالْ اهْلالُ اعْلَى اغْزَالُ غَرْقُ بَهْلُ اسْفِنْتُ

الحربة
طِيرْ امْشَى لِي وُلاعْرَفْتُ فِينْ امْشَى صَابَغْ لْشْفَارْ
فَدْفَدْ بَجْنَاوْحُ وُطَارْ
تَلْقِينِي بِهْ يَالْمُولَى طَالَتْ بَالْوَحْشُ غِيبْتُ