قَصِيدَة اَلْفَجْرْ
للشيخ محمد بوزيان          مبيت ثلاثي

القسم الأول
شُفْ اَهْمَامْ اَلضَّوْ كِيفْ رَتْقَا  بَضْيَاهْ  اَلَبَاهِـي
تَاكًـْ مْنَ اَلقَبْلاَ اَمْنَارْتُ تَتْلاَلاَ بَضْيَاهَــــا
فِيهْ اَسَطَوْتْ اَلِّي اَنْشَاهْ

مِيرْ اهْمَامْ اشْجِيعْ رَاكَبْ اجْوَادْ اشْكًـَرْ بَوَّاهِـي
وَمْقَلَّدْ سَكِّينْ  بَنْدْقِيَّا  فَالْجَوّْ اصْفَاهَـــــا
لا مَنْ يَقْدَرْ يَلْتْقَــاهْ

شُفْ اعْلامُ تَاكَـْ شُفْ جُنْدُ مَنْ غِيرْ امْلاهِـي
دُكَـْ عْلَى الْبِيدَا اسْرَادْقُ وَمْحَالُّ سَدَّاهَـــا
كُلّْ ارْكُنْ عَمَّرْ افْضَاهْ

شُفْ ابْطَالُ رَاكْبِينْ لَلْحَرْبْ الْيُوتْ ادْوَاهِــي
يَجْرِوْعْلَى الدَّاجْ لامْكًـَامْ ابْقَى لِهْ امْعَاهَـــا
ضَمّْ اجْنَاحُ وَخْتْفَــاهْ

شُفْ انْجُومُ غَرَّبُ وُ لايَبْقَى عَقْلَكْ فَاهِـــي
هَدِ  حَكْمَا بَالْغَا كْمَا كَوَّنْهَا مَوْلاهَــــــا
وَحْسَنْهَا كِيفْ رَتْضَـاهْ

الحربة
اسَاهِي يَكْفَا مَنْ السّْهُو مَالَك بَالَك سَاهِـــي
يَقَّظْ جَفْنَكْ للسّْرُورْ تَغْنَمْ فَرْجَا وَنْزَاهَـــا
شُفْ الْفَجْرْ انْبَا اضْيَاهْ

القسم الثاني
سارحة
شُفْ الصُّبْحْ اتْبَاهَـــا
فِي سَطْوَى  وَنْبَاهَــا
دُكَـْ عْلَى الْبِيدَا اخْبَــاهْ

كَمْ مَّنْ قَوْمْ اسْبَاهَـــا
بَنْسِيمُ حَيَّاهَـــــا
وَدْنَاوْ يِغَنْمُ ارْضَـــاهْ

شُفْ الشَّمْسْ اضْيَاهَــا
عَلْ لَجْدَارْ اتْضَــاهَا
لَوْنُ دَهْبِي مَا اصْفَــاهْ

شُفْ اطْيَارْ الْغَاهَـــا
تَسْبِي مَنْ يَصْغَاهَــا
كُلّْ افْصِيحْ عْلَى الْغَــاهْ

الْحَدَّادْ ابْمَايْتُ ايَّقَّظْ مَنْ عَقْلُ سَاِهـــي
شُفْ أمّْ الْحَسَنْ فَلْغْصَانْ اتْغَرَّدْ بَهْوَاهَـا
صَوْتْ الْعَدْرَى مَاحْـلاهْ

شُفْ الْكَنَارْ الْفْصِيحْ عَنْ وَرْدُ مَايَنْتَاهِـــي
شُفْ الْحَرْبَلْ وَ الْهْزَارْ دَاكْ الْهَدَا بَفْقَاهَـــا
عَمَّرْ وَرْدُ  مَاخْطَـــاهْ

شُفْ الْبُلْبُلْ نَحْتَكِي افْقِيهْ فْطَـــاعَتْ الالهِ
دَايَمْ عَلْ لَدْكَارْ مَايْزُولْ اوْرَادُ يَقْرَاهَــــا
صَوْتُ يَسْبِي مَنْ اصْغَاه

شُفْ الْفَخْتْ مَعْ لِمَامْ  كِيفْ الْخَاطَرْ يَشْتَاهِـي
شُفْ اطْيَارْ عْلَى الْصْنَافْ كَيْفْ اتْسَبَّحْ مَوْلاهَا
مَابَيْنْ اغْرَاسْ اُمْيَــاهْ

الحربة
اسَاهِي يَكْفَا مَنْ السّْهُو مَالَك بَالَك سَاهِـــي
يَقَّظْ جَفْنَكْ للسّْرُورْ تَغْنَمْ فَرْجَا وَنْزَاهَـــا
شُفْ الْفَجْرْ انْبَا اضْيَاهْ

القسم الثالث
سارحة
شُفْ اشْجَارْ اكْسَاهَـــا
بَالسَّرّْ مَنْ انْشَاهَــا
وَعْرَايَسْ حَسَانْهَــــا

تْتِيّهْ مَنْ رَاهَـــــا
فَاْح انْسِيمْ اشْدَاهَـا
تَرْقَصْ فِي بُسْتَانْهَـــا

ادْوَالِي فَحْضَاهَــــا
فَسْرَايَرْ تَرْضَاهَــا
شُفْ اسْلُوكْ اخْضَالْهَــا

وَبْلِنْزَا فَعْلاهَـــــا
وَتْرَنْجَاتْ احْدَاهَــا
شُفْ الْيَاسْ  ْﮔبَاَلْـهَــا

شُفْ الْوَرْدْ امِيرْ عَنْ اجْنُودْ النَّوَّارْ ايْبَاهِـي
فَحْوَاضْ الْبِيدَ الْعَاطْرَ ابَنْسِيمُ دَكَّاهَـــــا
طَافَحْ عَايَمْ فِي انْدَاه

شُفْ ازْهَارْ الرَّنْجْ كَنّْ جَوْهَرْ مَالُ تَشْبَاهِـي
شُفْ اشْجَارْ الْقِقْلانْ شُفْ انْوَارُ وَتَاهَــــا
لَوْرِيقْ الصَّافِي كْسَاهْ

شُفْ الطَّمَّاجْ الْبْهِيجْ فَبْهَاهْ ادْهَانِي دَاهِــي
شُفْ النَّوَّارْ الْخِزْرَانْ للَشَّمْسْ  يْدُورْ مْعَاهَــا
لَحْكُمْ وَ الْخَيْلِي احْدَاهْ

شُفْ الْخَبُورْ النّْحِيلْ بَهْوَاهْ اوْهِينْ اوَّاهِــي
نَحْكِي عَاشَقْ نَارْ  لِيعْتُ  فَصْيَارُ  مَعْتَاهَـــا
لَصْفِرَارْ اكْسَى اعْضَاهْ

شُفْ امْشَرْقِيَّ امْثِيلْ عَدْرَىَ تَسْبِي لَوْلاهِــي
شُفْ ازْرِيرَق ْزَانْ جِيدْهَا  بَوْشَامُ بَهَّاهَــــا
شُفْ النَّسْرِ فِي احْضَاهْ

الحربة
اسَاهِي يَكْفَا مَنْ السّْهُو مَالَك بَالَك سَاهِـــي
يَقَّظْ جَفْنَكْ للسّْرُورْ تَغْنَمْ فَرْجَا وَنْزَاهَـــا
شُفْ الْفَجْرْ انْبَا اضْيَاهْ

القسم الرابع
سارحة
شُفْ الارْضْ اُمَاهَـــا
يَجْرِي فَوْقْ اتْرَاهَـا
بَجْدَاوَل ْعَنْ كُلّْ جِيـــهْ

اطْفَى عَطْشْ اضْمَاهَــا
وَسْقَاهَا وَرْوَاهَـــا
وَخْضَارَتْ وَحْيَاتْ ِبـــهْ

بِينْ احْرَاجْ اعْفَاهَـــا
فِقْ اتْغَنْمْ انْزَاهَـــا
لاتَضْحَى عَنْهَا اوْلِيـــهْ

فِي حَضْرَا نَهْوَاهَـــا
عَقْلِي طَاشْ امْعَاهَـا
وَقْتْ الْفَجْرْ سْرُورْ فِيــهْ

الْفَجْرْ وَقْتْ انْزَاهَتْ الْقْلُوبْ اتَطْرِيدْ الاهِـي
سَعْدْ الِّي لَهْمُ اللهْ لِهْ اوْقَاتُ يَرْعَاهَــــا
عَمَّرْ وَقْتُ مَاخْطَـاهْ

الْفَجْرْ وَقْتْ الْخَيْرْ سَاعْتُ قُمْ اتْشُوفْ كْمَاهِي
وَسْأَلْ مَوْل ْالْمُلْكْ فَعْسَاكْ اسْرَارُ تُعْطَاهَـــا
وَطْلَبْ يَا سَاهِي اللهْ

يَجْمَعْنَا فِي سَاعَتْ الرّْضَى نَزْهَاوْ ابْتَنْبَاهي
مَوْلانَا فَضْلُ كْثِيرْ وَرْحَمْتُ مَنْ يَرْجَاهَــــا
تَتْبَاشَرْ بِهَا اعْضَـاهْ

مَسْعَدْهَا سَاعَا عْلَى الرّْضَا يَا صَاحِي وَ اللهِ
سَاعَا مَسْعُودَ امْبَارْكَا لاقِيمَا لَشْرَاهَـــــا
سَعْدْ الِّي سِيدُ اعْطَاهْ

فَازُ هَلْ لَوْرَادْ وَنْتْهَاوْ عْلَى كُلّْ انْوَاهِـــي
سَلْكُ نَهْجْ اطْرِيقْ صَالْحَا تَرْكُونَا فَسْوَاهَـــا
مَدْرَا يَهْدِينَــا اللهْ

الحربة
اسَاهِي يَكْفَا مَنْ السّْهُو مَالَك بَالَك سَاهِـــي
يَقَّظْ جَفْنَكْ للسّْرُورْ تَغْنَمْ فَرْجَا وَنْزَاهَـــا
شُفْ الْفَجْرْ انْبَا اضْيَاهْ

القسم الخامس
سارحة
رَمْزْ الْقُولْ  انْتَاهَــــا
حُلا فِي مَعْنَـاهَـا
يَاقُوتَا فِي تَاجْهَــــا

تَكْلِيــلُ عَنَّاهَـــــا
وَجْوَاهَرْ فَصْفَاهَــا
فَسْقَلِّي  تَرْكًامْهَـــــا

احَفَـّاظْ ارْوَاهَـــــا
وَتْحَلاّ بَلْغَــاهَــا
وَتْأَمَّلْ فَلْفَاظْهَـــــا

فَرْجَـا مَنْ يَصْغَاهَـــا
تَرْحَمْ عَنْ مَوْلاهَـا
لَمْطَرَّزْ مَنْوَالْهَـــــا

ادْكُرْ يَاحَفَّاظْ  اسْمِي وَفْخُرْ بِهْ اُضَاهِـــي
مِيمِينْ وُ حَا وُ دَالْ مَايَخْفَالَكْ مَعْنَاهَــــا
قَالْ الْمَاهَرْ فِي الْغَـاهْ

مَانَدْخُلْ سُوقْ الْمْزَاحْمَا بَصْنَاطَحْ وَجْبَاهِــي
حَاضِي عَرْضِي مَاْنِريدْ دْمُومَا  مَانَرْضَاهَــا
وَالْجَاحَدْ لَيْسْ نَصْغَاهْ

وَسْلامِي لَضْرَاغَمْ النّْظَامْ دُهَاتْ التَّفْقَاهِـــي
مَادَبَّتْ لَبْزَالْ عَنْ اﮔـْطَارْ البِيدَا وَوْطَاهَــا
وَهْوَى لَمطَرْمَنْ سْمَاهْ

بَعْطَرْ وَعْطَرْشَا وُغَالْيَا يُدْكَارْ فْلَفْوَاهِـــي
مَهْدِ لَسْيَادِي هْلَ الْفْضَلْ وُ الْقْدَرْ وُ لُوجَاهَـــا
مَنْ لِهُمْ سَطْوَى وُجَاهْ

بِهُم ْادْرَاجِي ارْقَاتْ بِهُمْ اصْفَاتْ امْيَاهِــي
وَسْلَكْتْ افْبَحْرْ الّْغَا وُلَقْمَاهَرْ مَايَخْفَاهَــــا
تَبْرْ الْمَعْنَى مَنْ احْصَاهْ

الحربة
اسَاهِي يَكْفَا مَنْ السّْهُو مَالَك بَالَك سَاهِـــي
يَقَّظْ جَفْنَكْ للسّْرُورْ تَغْنَمْ فَرْجَا وَنْزَاهَـــا
شُفْ الْفَجْرْ انْبَا اضْيَاهْ