قَصِيدَة اَلْفَجَرْ
للحاج ادريس بنعلي        مبيت ثلاثي

القسم الأول
ءَاهْ عْلَى مَنْ تَابَعْ لَهْوَى حَتَّى ضَلُّو عَنْ سْبِيلْ  لَهْدَى وَفَامْرُ حَارْ
وبْقَى تَايَهْ طَامَسْ اَلْبْصَـرْ
يَعْتَرْ وِ يْقُومْ بِينْ حَافَاتْ اَوْعَـارُ

وَسْقَاهْ مْنَ اَمْدَامْ زِينَتْ اَلدَنْيَا وَكْتَبْلُ فْلُوحْتُو  يَبْلِيسْ اَلْغَـــرَّارْ
اَنْتَ بَاقِي طَايَلْ اَلْعْمَــرْ
زِدْ فْحَالْ اَلزَّهُو بْحَالَكْ يُعْــدَارُ

وَغْبَطْ فِي نُومْ اَلشْبَابْ حتَّى فَتُوهْ اَلسَّابْقِينْ مَنْ بَاعُ دَارْ بْــدَارْ
وَتْيقَّضْ بَعْدْ مَا اَسْكَــرْ
وْجَدْ نَفْسُ وُ صَابْ لَمْزَاحْ اَصْوَارُ

اَمَنْ كَانْتْ هَكْدَا اَوْصَافُ قُمْ فَعُكًـْبْ اَلدَّاجْ تْطَلْبُ نَعْمْ اَلْغَفَّـــارْ
وَيْحَكْ بَانْتْ غُرَّتْ اَلْفْجَرْ
وَسْوَادْ اَلدَّاجْ لاَجْ وَبْيَاضْ اَنْهَـارُ

الحربة
غَابْ ظْلاَمْ اَلِّيلْ وَالصّْبَاحْ اَتْجَلَّى بَمْحَاسْنُ وُطَابْتْ نَغْمَتْ لَطْيَـارْ
وَعْبَقْ رِيحْ نْسَايَمْ اَلزّْهَـرْ
وَالْوَرْدْ عْلَى اَلْمْلاَحْ يَغْرَمْ  دِينَـارُ

القسم الثاني
شُفْ نْجُومْ اَلصُّبْحْ كَعْرَايَسْ كُلّْ عْرُوسَا بَالْمْحَاسَنْ بَرْزْتْ فْ يْزَارْ
شُفْ اَلزُّهْرَا خَدّْهَا زْهَـرْ
شُفْ اَلْمَرِّيخْ لاَحْ وَسْطَعْ بَنْـوَارُ

شُفْ اَلثُّرِيَّا تْقُولْ تَاجْ مْنَظَّمْ بَالدُّرّْ وَالْجْوَاهَرْ تَخْطَفْ لَبْصَـــارْ
وَ اَلنَّسْرِ بَجْمَالْهَا بْهَـــرْ
شُفْ اَلْغَرَّارْ بِهْ لَكْوَاكَـــبْ دَارُ

شُفْ سْمَا اَلدُّنْيَا صْفَاتْ وَ ضْوَاتْ بْنُورْاَنْجُومْهَا شُفْ اَلْبَدْرْ اَلسَّيَارْ
شُفْ اَلْفَجْر ْضْوَا عْلَى اَلْقَمَرْ
شُفْ نْجُومْ اَلْبْهِيمْ مَنِ حُسْنُ غَـارُ

تَاكُـْ مْنَ اَلْقَبْلَى عَلَى جْوَادُ لَبْيَضْ حَسْبُ شْرِيفْ هَشَامِي مَنْ لَخْيَارْ
لاَبَسْ تُوبْ اَلْعَزّْ وَاَلنّْصَـرْ
وَالْوَزْرَا عَلَى يْمِينُ وِ يْسَـــارُ

شُفْ عَنْ كُرْسِي مْلاَكْتُ يَخْضَعْ لَلنَّجْمَا خْلِيلْتُ كَعَاشَقْ صَبَّــارْ
شُفْ اَلِّيلْ مْضَا مَنْ اَلْوْكَـرْ
غَرَّبْ بَعْدْ اَلْمْكًـَامْ وَرْحَلْ مَنْ دَارُ

الحربة
غَابْ ظْلاَمْ اَلِّيلْ وَالصّْبَاحْ اَتْجَلَّى بَمْحَاسْنُ وُطَابْتْ نَغْمَتْ لَطْيَـارْ
وَعْبَقْ رِيحْ نْسَايَمْ اَلزّْهَـرْ
وَالْوَرْدْ عْلَى اَلْمْلاَحْ يَغْرَمْ  دِينَـارُ

القسم الثالث
اَسَاحِي مِيرْ اَلًصْبَاحْ بَسَّمْ ثَغْرُ وَرْخَا اَلّْثَامْ بَعْدْ صْفَارْ وُسَتْنَــارْ
وَبْعَتْ بَبْرَاتُ لْمَنْ سْهَـرْ
وَعْطَاهَا للَنْسِيمْ هُوَّ بَشَّــــارُ

وَدْفَعْهَا كَفّْ اَلنّْسِيمْ لَطْيَارْ اَلرَّوْضْ وُقْرَاوْهَا  فْظَلْ مْنَابَرْ لَشْجَـارْ
بَالصِّيغَا وَ نْهَايَتْ  اَلْجَهَـرْ
وَلْقَاوَهْ بَالْحْسَانْ كَاتَبْ فَسْطَــارُ

اَلْحَمْدُ لِلَّهْ والصَّلاَتْ عْلَى اَلْهَادِي كَامَلْ اَلْبْهَا وَالْآلْ وُ لَنْصَـــارْ
مَنْ مِيرْ اَلْقَبْلاَ اَلْمَشْتْهَــرْ
اَلْهَازَمْ جُنْدْ اَلْغْسِيقْ بَجْمَالْ سْرَارُ

اِلَى نَاسْ الصَّوْمْ وَ السّْهَرْ مَنْ قَامُ وَ حْيَاوْ لِيلْهُمْ بَتْلاَوْتْ لَسْـوَارْ
هَلّْ مَنْ طِيبْ سْلاَمَكْ اَلْعْطَرْ
يَحْيِيهُمْ بَالدّْوَامْ بَنْسِيمْ  زْهَـــارُ

اَنَا لِيكُمْ  فَالْوُقُوفْ شَاهَدْ بِينْ اَتْرَكْتُ مْنَامْكُم  ْفْسَاعَتْ لَسْحَــارْ
وَقْطَعْتُ لَوْقَاتْ بَالدّْكَـــرْ
سَوفَ يَسْقِيكُمْ اَلنّْبِي مَنْ كَوْثَــارُ

الحربة
غَابْ ظْلاَمْ اَلِّيلْ وَالصّْبَاحْ اَتْجَلَّى بَمْحَاسْنُ وُطَابْتْ نَغْمَتْ لَطْيَـارْ
وَعْبَقْ رِيحْ نْسَايَمْ اَلزّْهَـرْ
وَالْوَرْدْ عْلَى اَلْمْلاَحْ يَغْرَمْ  دِينَـارُ

القسم الرابع

يَقَّضْ جَفْنْ سْهُوكْ يَالسَّاهِي وَنْظَرْ لَطْيَارْ كُلّْ وَاحَدْ حَايَزْ مَنْبَـارْ
يَخْطُبْ لَلْعَشَّاقْ بَالْخْبَــرْ
وَصْحَابْ اَلْحَالْ كَايْمِيسُ بَخْبَـارُ

صِغْ اُمْ اَلْحَسَنْ حَالْهَا كَحَالْ اَلْخَنْسَا بَلْبْكَا  وَفْصَاحَتْ لَشْعَـارْ
صَبْحَتْ سَكْرَانَا بْلاَ خْمَـرْ
اِلاَّ خَمْرْ اَلنَّدَا اَلْعَاطَرْفَشْجَـــارُ

وَالسَّمْرِيسْ يْمِيسْ بَالفْصَاحَا كَمْرُوُ اَلْقِيسْ رَقّْ وَرْقَصْ وَفْشَا لَسْرَارْ
وَالْحَدَّادْ بْمَايْتُ اَكْثَـــرْ
وَ الْبُلْبُلْ هَلّْ لْبَابْ فَخْطَابُ حَـارُ

وَالْوَرْشَانْ فْصِيحْ كَافْقِيهْ يَدَرَّسْ لَحْدِيثْ بَالرّْسَالاَ وَالْمُخْتَصَــارْ
وَ مَّقْنِينْ يْسَرّْ مَنْ حْضَـرْ
قِيَّمْ حَضْرَا صْغِير لاَزَمْ  تَكْـرَارُ

وَالْعَالَمْ لِيمَامْ بِينهُمْ تْقَدَّمْ وَقْتْ اَلشّْرُوقْ وَعَلَمْهُمْ لَلسَّفَــــــارْ
اَمَرْهُمْ  يَغْدَاوْ لَلْوْكَـــرْ
اَلْجَوّْ بْغِيرْ زَادْ  فَالَّحْظَا طَـــارُ

الحربة
غَابْ ظْلاَمْ اَلِّيلْ وَالصّْبَاحْ اَتْجَلَّى بَمْحَاسْنُ وُطَابْتْ نَغْمَتْ لَطْيَـارْ
وَعْبَقْ رِيحْ نْسَايَمْ اَلزّْهَـرْ
وَالْوَرْدْ عْلَى اَلْمْلاَحْ يَغْرَمْ  دِينَـارُ

القسم الخامس
اَشْ رَا مَنْ لاَبَاتْ بِينْ دُوحَاتْ فْمَنْزَهْ بَالْدْوَامْ تَجْرِ تَحْتُ  لَنْهَــارْ
وَغْنَمْ دَاكْ  اَلَّيلْ بَلاْجَـــرْ
حَتَّى هَبّْ اَلنّْسِيمْ وَدْكَى مَعْطَـارُ

اَشْ رَا مَنْ لاَبَاتْ فَالدّْجَا يَتْهَجَّدْ حَتَّى ضْوَى عْلِيهْ اَلْفَجْرْ  اَلْمَسْرَارْ
وَصْبَحْ سَالَمْ طِيَّبْ  اَلصَّـدَرْ
وَتْرَكَ دَاكْ اَلضّْيَا فْوَجْهُ  اَثَــارُ

بِينْ اَطْرَنْجْ وُرَنْجْ وَالرّْيَاحَنْ وُ يَاسْ وُيَاسْمِينْ وَ الْعَكْرِعَلْ لَخْضَارْ
أشْ رَا مَنْ لاَمَتَّعْ  اَلنّْظَــرْ
فَجْمَالْ اَلِّي يْحَبّْ ودْعَـاهْ وُزَارُ

اَشْ رَا مَنْ لاَ هَامْ بَالْمْحَبَّا وَ فْنَى وَبْكَا وُ لاَ بْقَالُ فَالْقَلْبْ غْيَـارْ
وَسْهَرْ عْلَى اَلشَّفْعْ  وَالْوْتَـرْ
وَصْبَحْ عَنُّ اَحْجَابْ هُوَّ  سَتَّــارُ

هَدَا هُوَّ اَلْحَيّْ فِي حْيَاتُ عَايَشْ وَمَّا اَلْغِيرْ جِيفَا مِيَّتْ يُقْــــبَارْ
مَا بَصَّرْ مَسْكِينْ  مَابْصَـرْ
غَابْ فْلِيلْ اَلْهْوَى  وُسَاعَفْ  غَرَّارُ

الحربة
غَابْ ظْلاَمْ اَلِّيلْ وَالصّْبَاحْ اَتْجَلَّى بَمْحَاسْنُ وُطَابْتْ نَغْمَتْ لَطْيَـارْ
وَعْبَقْ رِيحْ نْسَايَمْ اَلزّْهَـرْ
وَالْوَرْدْ عْلَى اَلْمْلاَحْ يَغْرَمْ  دِينَـارُ

القسم السادس
اَحَفَّاظِي خُدْ لِكْ دُرَّا خَضْرَا فَعْقَدْهَا سْلِيمَا صُنْعَتْ لَفْكَــــارْ
اَتْحَفْظَكْ مْنَ اَلْبَاسْ وَلَمْكَـرْ
خُدْ  اَلِيَبْرِيزْ فِي نْهَايَتْ  تَشْحَـارُ

حَفْظُ يَا حَفَّاظْ يَرْتْقَا شَانَكْ قُدَّامْ اَلْغْفِيلْ طَالْ اَلْعَمْرْ اَوْ قْصَــارْ
يَبْرِيزْ اَلاَّ شَابْهُ  اَتْبَــــرْ
شَهْدَتْ بِهْ اَلدّْهَاتْ  وَسْلَكْ  دِينَـارُ

وَاَلدَّاعِي مَا شَاخْ مَا تْشِيخْ غِيرْ دْخَلْ لَلْكْلُوفْ وَتْسَمَّى مَنْ لَحْبَـارْ
حَلْمَتْ بِهْ اَلْوَقْتْ  وَنْدْكُــرْ
وَصْبَحْ يَعْلَى عْلَى هْلَ اَلْوَقْتْ وكْبَارُ

وَالْعَامَرْ فَالْوَادْ لِيسْ يَعْلَى وَالْخَاوِ تُوجْدُ يَعْلِّي نَفْسُ  فَاَلــــدَّارْ
لاَ كِنِّي بَاقِي اِلَى  عْثـــَرْ
نَجْبَدْ بِهْ اَلْحْصِيرْ وِ يْبَانْ  اَعْـوَارُ

اَمَا مَنْ غَتَّابْ كَانْ كَيَغْتَبْ وَغْتَبْنِي  بْلاَ حْيَا لِهْ  الْعَمْرْ اَقْصَــارْ
نْكًـَدَّدْ عَضْمُ  وُ نَكْسَــــرْ
جَاهْ جْمِيعْ اَلْبْلاَ وُحِيلاَتُ بَـــارُ

وَ مَا مَنْ قُنْجَارْ زَاغْ وَطْغَى وَفْشَدْقُ شِي نْيَابْ نْهَدُّ لُ  بَحْجَــارْ
تَمَّا صَادَفْ دَقَّتْ اَلْعْمَـــرْ
مَاتْ اَلْقَنْجَارْ لاَ مَنْ تْبَعْ اَثَـــارُ

وَمَا مَنْ مَحْسَادْ مَاتْ بَاَلْحْسَدْ اَللهْ يْجِيرْنَا وُ يَحْفَظْنَا  مَنْ  لَغْيَــارْ
اَيَحْفَظْ   سَلْطَانْنَّا  اَكْثـــَرْ
وِ يَحْفَظْ هَلْ اَلّْغَا كْبَارُ  وَ صْغَـارُ

وَسْلَامِي نَهْدِيهْ قَالْ لاَدِيبْ اَلْحَاجْ اَدْرِيسْ بَنْ عْلِي مَا فَاحَتْ لَزْهَارْ
لَوْلاَدْ اَحْمَدْ سِيَّدْ  اَلْبْشَـــرْ
فَمْدِيحُ اَتْفَاجَتْ لَلْقَلْبْ غْيَــــارُ

اَتْسَلَّى نَكْدِي وُ نَلْتْ قَصْدِي وَصْحَبْتْ هْلَ اَلدَّوَا وَسَلْكُ بِيَّ  لَوْعَارْ
وَلِلَّهْ  اَلْحَمْدْ  وَالشّْكَــــرْ
مَا سَارْ مْعَ  اَلْبْزَالْ حَادِي   بَشْعَارُ

الحربة
غَابْ ظْلاَمْ اَلِّيلْ وَالصّْبَاحْ اَتْجَلَّى بَمْحَاسْنُ وُطَابْتْ نَغْمَتْ لَطْيَـارْ
وَعْبَقْ رِيحْ نْسَايَمْ اَلزّْهَـرْ
وَالْوَرْدْ عْلَى اَلْمْلاَحْ يَغْرَمْ  دِينَـارُ