قَصِيدَة اَلْفَجَرْ / الْخَمسْ أُوقَاتْ
نظم محمد الْحْمَرْ

القسم الأول
ارَاسِي خِيرْ لِكْ تُبْ الْمُولاكْ وُعَظَّمْ الْقْدَرْ
بَالْحَمْدْ اُغَايَتْ الشّْكُرْ
لَلْحَيّْ الوَاحَدْ الْمْهَيْمَنْ مُولْ السَّطْوَا الْعَالْيَا

وَتْأَدَّبْ لَلْكْرِيمْ مُولْ الْقُدْرَ الَمْدَبَّبْ الاْمَرْ
وَطْلَبْ لْعْفُو مْعَ السّْتَرْ
وَالْعِنَيَا مْعَ الصَّحَّا وَالْبَرَكَا الْوَافْيَا

رَبِّي غَنِي اكْرِيمْ جِيَّدْ مَوْجُودْ ايْسَمْحْ وْيغْفَرْ
وِيْشَافِي هَوْلْ كُلّْ ضَرّْ
وِيْسَلَّكْنَا اجْمِيعْ يَعْتَقْنَا مَنْ نَارُ الْحَامْيَا

بِجَاهْ اهْلَ الصّْفَا وُجَاهْ الْكُتُبْ وُجَاهْ مَنْ ادْكُرْ
وَهْلَ الْقُرْءَانْ وَ الْفْجَرْ
وَجْبَلْ عَرْفَا وُجَاهْ مَنْ دَارْ اُعَمَّرْ كُلْ زَاوْيَا

وَالْبُدَلىِ مْعَ المْشَايَخْ وَالاوْلِيَّا اهْلَ الصّْبَرْ
وَنْجُومْ الدَّاجْ وَ الْبْدَرْ
وَالشَّمْسْ وُجَاهْ مَنْ اتْضَرَّعْ وَهْلَ النِّيَّا الصَّافْيَا

نَطْلَبْ رَبِّي يْجُودْ عَنِّي وَنْعُودْ امْوَابَدْ الفْجَرْ
نَعْبَدْ الدَّايَمْ الْكْبَرْ

ونْكَثَّرْ فَالصّْلَى عْلَى شْفِيــــــعْ الامَّا الزَّاكْيَــــــا

الحربة
دَبا يَعْفُو اللهْ عَنِّي وِنْعُودْ امْوَابَدْ الْفَجْر
نَعْبَدْ الدَّايَمْ الْكْبَرْ
ونْكَثَّرْ فَالصّْلَى عْلَى شْفِيــــــعْ الاُمَّا الزَّاكْيَــــــا

القسم الثاني
الْخَمْسْ اوْقَاتْ مَنْ احْلاهَا
بِهَا رَبْحُ اهْلَ الْعْلــُومْ

الْخَمْسْ اوْقَاتْ مَنْ ارْضَاهَا
بِهَا يَنْجَا مَنْ الْهْمُــومْ

الْخَمْسْ اوْقَاتْ مَنْ افْضَلْهَا
قَالْ الْمَوْلَى ارْبَحْتْ قُومْ

الْخَمْسْ اوْقَاتْ مَنْ اسْكَنْتْ افْقَلْبُ يَنْجَا مَنْ الْمْكَرْ
وَالْهَوْلْ اغُمَّتْ الْقْبَــرْ
وِيْنَجِّيهْ الْغْنِي الدَّايَمْ مَنْ شَدَّتْ كُلّْ دَاهْيَا

الْخَمْسْ اوْقَاتْ مَنْ افْضَلْهَا دِينْ الاسْلامْ مَشْتْهَرْ
لادِينْ عْلِيهْ يَنْتْصَـــرْ
بَالْحَجّْ وصُومْ قَالْ رَبِّي اُهَلْ لَكْتُوبْ قَارْيَا

لَجْهَادْ امَنْ اتْسَالْ دَكْرُ جِيَّدْ لَجْوَادْ فَالسّْطَرْ
وَهْلُ فَالْعَزّْ وَ النّْصَــرْ
وَالزَّكَا فَرْضْ عَلْ الامَّا بَاشْ اهْلَ اللهْ زَاهْيَا

شُفْ اهْلَ الدِّينْ كُلّْ وَاحَدْ فَالْجَنَّا عَدّْ لُ اقْصَرْ
وَقِيلا عَدّْلُ اكْثَرْ
مُولْ الْحَسْنَا ارْضَاهْ رَبِّي مَاخِيَّبْ قُومْ رَاضْيَا

يَاسَعْدْ الِّي مَنْ اعْمَلْ تُكْلُو فِي مَوْلاهْ مَاخْسَرْ
عَنُّ يَسْهَالْ مَا اوْعَــرْ
وَلِّي جَهْلُ اعْمَاهْ وَخْسَرْ تَابَعْ نَفْسُ الْخَاطْيَا

الحربة
دَبا يَعْفُو اللهْ عَنِّي وِنْعُودْ امْوَابَدْ الْفَجْر
نَعْبَدْ الدَّايَمْ الْكْبَرْ
ونْكَثَّرْ فَالصّْلَى عْلَى شْفِيــــــعْ الاُمَّا الزَّاكْيَــــــا

القسم الثالث
ارَاسِي لَلْغْنِي اسْتَرْجَعْ
وَعْرَفْ الْمُوتْ كَايْنَا

اصْغَى لِيَّ وُكُنْ تَسْمَعْ
وَطْرِيقْ الْحَقّْ بَايْنَا

بَالصُّوْمْ مْعَ الصّْلَى اتْوَلَّعْ
وَالْمَكْتُوبَا امْعَايْنَا

رَاسِي نُوصِيكْ يَا السَّاهِي قَصَّرْ مَنْ قَلّْتْ الْوْقَرْ
قِيلْ اتْلاتَا هْلَ الْمْكَرْ
ابْلِيسْ مْعَ الْهْوَى وُنْفْسَكْ هَادُ شَرّْ الْمْلاهْيَا

اِلَا تَسْمَعْنِي انْوَصِّيكْ اصْغَى لَمْوَاهَبْ الشّْعَرْ
لَوْطَالْ الْفُلْكْ وَ الدّْهَرْ
لاتَعْبَدْ غِيرْ دِينْ رَبِّي قِيلْ الدُّنْيَا الْفَانْيَا

اشْ امْنَ ازْهُو ايْضَادّْ الخَمْسْ اوْقَاتْ اسَرّْهَا اظْهَرْ
مَاكِيفْ اوْلاعَتْ الفْجَرْ
وَالصُّبْحْ انْزَاهْتُ افْوَقْتُو وَ النَّجْمَا فِيهْ ضَاوْيَا

مَاكِيفْ انْزَاهَتْ الظّْهُرْ انْزَاهَا بَصْفُوفْ تَنْدْكُرْ
هَدَاكْ الذَاكْ مَااصْبَرْ
مَنْ اوْرَا لِيمَامْ كَاتْبَايَعْ نَاسْ التَّقْوَى امْسَالْيَا

الحربة
دَبا يَعْفُو اللهْ عَنِّي وِنْعُودْ امْوَابَدْ الْفَجْر
نَعْبَدْ الدَّايَمْ الْكْبَرْ
ونْكَثَّرْ فَالصّْلَى عْلَى شْفِيــــــعْ الاُمَّا الزَّاكْيَــــــا

القسم الرابع

الْعَصْرْ افْوَقْتُوا كْرَامَا
وَهْلُ لَكْرِيمْ اكْرَمْهُمْ

عَمْدَا عَمْدَا لْمَنْ اتْعَامَا
يَتطَّوَّفْ وِيشْدَاكًـْهُمْ

وَنَاخَوْفِي اتْجِي انْدَامَا
لَلِّي هُوَّ ايْتَرْكْهُمْ

الْمْغَرْبْ امْنْ اتْسَالْ مَنْ صَلاهَا فِي وَقْتْهَا اظْفَرْ
لَعْشَا وَالشَّفْعْ وَ الْوْتَرْ
هَدُ رَبْحْ لِيسْلامْ جَمْلا وَهْلَ النِّيفَاقْ عَامْيَا

وَقْتْ الصَّلَى مْعَ لِيمَامْ اتْنَجِّي وَتْزِيدْ فَالْعْمَرْ
مَعْلُومَا مَالْهَا انْضَرْ
وَالتَّارَكْهَا انْهَارْ يَبْعَثْ عَيْنُ بَالدَّم ْبَاكْيَا

فِي جَهَنَّمْ مَنْزْلُ فِي بِيرْ الْفَلَقْ يَنْحْشَرْ
يَتْشَوَّا فُوقْ الجّْمَرْ
اللهْ ايْجِيرْنَا مَنْ الْقُومْ الِّي بَالْجُورْ طَاغْيَا

اَبْنَادَمْ تُبْ للهْ وُتْرْكْ الْعَيْبْ وَ الْغْدَرْ
مُولْ السَّاعَا الَى اظْهَرْ
ايْجَاهَدْ فَالْعَدَا بْسَيْفُ شَلا يُوْمْ الْمْشَالْيَا

تُبْ الْمَوْلاكْ الَّى ابْغِيتِي تَغْنَمْ الرّْضَى مْعَ السّْتَرْ
وَالتَّابَعْ جَهْلُ اخْسَرْ
امْشَا مَغْرُورْ غَرّْتُ نَفْسُ وِيمَانُ الْخَاسْرَا

الحربة
دَبا يَعْفُو اللهْ عَنِّي وِنْعُودْ امْوَابَدْ الْفَجْر
نَعْبَدْ الدَّايَمْ الْكْبَرْ
ونْكَثَّرْ فَالصّْلَى عْلَى شْفِيــــــعْ الاُمَّا الزَّاكْيَــــــا

القسم الخامس
يَاحَيّْ اَلاَّ يْنَامْ قَادَرْ
تَرْحَمْ لَسْلامْ كُلّْهَا

نَتْوَسَّلْ بَالنّْبِي الطَّاهَرْ
وَالْمُعْجِزَا وُسَرّْهَا

وَصْحَابُ لامَتْ الغْنَاضَرْ
رَضْوَانْ اللهْ عَنّْهَا

اللَّهُمَّ اْبحَقْ فَضْلَكْ يَارَبِّي دِبَّبْ الامَرْ
سَلَّكْ لَحْوَالْ يَالْبَرّْ
احْنَا فِي عَارْ لالافَاطِمَا الزَّهْرَا الزَّاكْيَا

بَالسَّمَوَاتْ وَ الْبْحُورْ وَ الرَّوْضَا وَ الشَّبِّيكْ وَ الْقْبَرْ
وَالْخُلَفَا وُ بُوبْكَرْ
وُصَرْخَتْ الشّْجِيعْ عَلِي تَحْفَظْنَا مَنْ المْلاهْيَا

اللَّهُمَّ ابْحَقّْ عَثْمَانْ وُبَرْكَتْ سِيدْنَا اعْمَرْ
وَبْسَدَاتِي أهْلَ بَدْرْ
امْعَ الْحَسْنِينْ وَالنّْبِي وُبَهْلَ النَّجْمَا الضَّاوْيَا

اللَّهُمَّ ابْحَقّْ مُلْكَكْ ادْرَكْ لِسْلامْ بَالنّْصَرْ
يَامَنْهُ بِنَا اقْدَرْ
كَفِى يَاذَالْجْلالْ كَفِى وَنْتَ مُولْ الْمْكَافْيَا

لَهْمَامْ اِلَى يْتُوكْ لِنَا قَبْلا مَازَالْ مَااظْهَرْ
لامَنْهُ جَايَبْ الْخْبَرْ
بَتَّارْ ايْجِي ايْسَلّْ سَيْفُ مَابِينْ اسْيُوفْ مَاضْيَا

الحربة
دَبا يَعْفُو اللهْ عَنِّي وِنْعُودْ امْوَابَدْ الْفَجْر
نَعْبَدْ الدَّايَمْ الْكْبَرْ
ونْكَثَّرْ فَالصّْلَى عْلَى شْفِيــــــعْ الاُمَّا الزَّاكْيَــــــا

القسم السادس

مَصَّابْ اِجِي اضْيَا اعْيَانِي
يَفْدِ فِي لامَتْ الْجْحُودْ

هَدَا مَا قُلْتْ فِي اوْزَانِي
سُبْحَانْ المَالَكْ الْوْدُودْ

سَلَّمْ يَاحَافَظْ الْمْعَانِي
لَرْبَابْ الفَنّْ هَلْ الْجُودْ

سَلَّم ْللْمَاهْرِينْ جَمْلا مَافَاحْ الْوَرْدْ وَ الزّْهَرْ
مَنْ عَنْدْ التَّايْكْ الْحْمَرْ
بَلَّغْ هَذَ السّْلامْ لِهُمْ وَتْرُوحْ الدَّاتْ هَانْيَا

مَنْ بَعْدْ اسْلامْهُمْ صَلِّ عَنْ طَهَ طَيَّبْ الدّْكَرْ
مُحَمَّدْ سِيَّدْ الْبْشَرْ
صَلَّى اللهُ عْلِيهْ قَدّْ الْقَوْمْ الْحَيّْ وُ فَاْنَيا

صَلَّى الله عْلِيهْ قَدّْ القُرْءَانْ وَعْدَادْ مَنْ اسْطَرْ
وُمَنْ اقْرَاهَا سَرّْ اجْهَرْ
هِيَّ رَبْحِي وُرَاسْمَالِي بِهَا لَقْلُوبْ زَاهْيَا

صَلَّى اللهُ عْلِيهْ تَعْظِيمْ اتْهِيجْ وَتْهِيَّجْ الْفْكَرْ
بِهَا لَقْلُوبْ تَنْزْهَرْ
بِهَا نَهِّيتْ حُلّْتِي وَلْفَاظِي مَعْنَى امْخَاوْيَا

نَطْلَبْ رَبِّي يْجُودْ عَنِّي وَنْعُودْ امْوَابَدْ الْفْجَرْ
وَتَعْبَدْ الدَّايَمْ الْكْبَرْ
وَنْكَثَّرْ فَالصّْلَى عْلَى شْفِيــــــعْ الامَّا الزَّاكْيَــــــا