قَصِيدَة السَّاقِي

للشيخ الجيلالي امتيرد                         مبيت ثنائي

القسم الأول
اَلايَمْ مَـاهَــــزَّكْ حَــالْ مَــــا عْلِيكْ ابْكُـــلْفَـا قَلْبَكْ مُهَجْـــتُ هَنَّــاهَـــــا
مَنْ ابْهَــــا زِينَــــاتْ التَّخْلِيــــلْ

مَـــا شْفِيتِي مَـــــانَكْوِيتِي وَلا انْضَرْتِهُمْ فِي حَضْرَا عْلَى اتْفَــــاقْ ارْضَــاهَـــا
دِيكْ عَنْ دِي بَــــالْوَجْدْ اتْمِيـــــلْ

صَايْلا بَمْحَاسَنْ وَجْمَالْ كَاكْوَاكَبْ فَسْمَــــا صَــــافِي ابْنُورْ حُسْنْ اضْيَاهَا
مَـــالْهَا عَلْ لَوْصَــــافْ امْتِيــــلْ

طَلْقَتْ ادْوَايَبْهَــا وَهْوَاتْ كَـاتْعَــابَنْ وَنْقِيشْ عْلَى اخْدُودْهَـــا وَتَـاهَــا
وَالشّْفَــرْ عَلْ لَــــوْرُودْ ادْبــــــِيــــلْ

مَنْ ابْهَـاهُمْ رَوَّحْتْ اجْرَاحْ لِيلْتَنَـا كَـــانَتْ مَــــــايَقْوَى لْمَنْ اقْـــــوَى يَلْقَــاهَـــا
بْصُــولَتْ الْهِيبَـــا وَ التَّكْـــــلِيــلْ

دُوّْرُ بَـــالصَّفْرَا كِيسَــــــــــانْ كُلّْ وَحْدَا لاَحَتْ بَشْوَاقْهَــا الحَـــــافْ اغْطَـاهَــــا
جَـــــــرّْدُ غُــــــزْلانَـــاتْ الْبِيـــلْ

الحربة
السَّــاقِي وَكَّضْ لَرْيَــامْ رَدّْ بَـــالَكْ لَلنُّوبَــا لاتْغِيبْ عَنْ مُــــولاهَــا
كُــبّْ يَــا سَــاقِي رَاحْ الِّيــلْ

القسم الثاني
السَّــاقِي مَـــالَكْ وَلْهَــانْ
عِدْ لِي لا تَكْتَمْ سُــــولانْ
مَــالْ حَالَكْ مَـــالُ

قَــالْ لِّي مَكَـْوَانِي حَيْرَانْ
خَاطْرِ وَ السَّاكَنْ دَهْشَـــانْ
مَنْ ابْهَــــــــــا قَتَّـــــــــالُ

المْدَامْ وُحُسْنْ الْحَسَـانْ
وَالنّْضَرْ فَــالزِّينْ الفَتَّانْ
وَالْهْوَى وَاهْـــــــــــــوَالُ

كِيفْ مَـا بِينْ الْمَا وَالنَّـارْ اَوْ مَنْ دَارَتْ بِهْ اعْـدَاهْ كَاتطَّلْبْ افْــدَاهَــا
بْجُنْدْ رَامِي وَكَـْصَــاصْ الْخِيــــــــــلْ

تَنْتْقَــلْ بَطْرَارَدْ وَعْلُـومْ عَلْ الْحَرْبْ اتْشَالِي بَقْلُوبْ كَنّْ صَلْدْ اصْفَــاهَــا
كُلّْهَـا جَـرَّدْ سِيــفْ اسْــــقِيـــلْ

بَــالزّْعَمَـا وَ القُومْ ابْطَالْ كَنّْ وِيدَانْ احْكِيتْ الَى اتْجِي بْحَمْلَتْ اطْمَـــاهَــا
فِي ازْمَـــانْ الرَّعْـــــدَا وَ السِّيـــــلْ

والْفْرِيدْ النَّـايَحْ رَغَّابْ مَنْ الْمـولَى يَطْلَبْ لَنَّفْسْ يَـاعْـدُولْ انْجَــــــــاهَا
اشْــنُ مَـنْ لالِـهْ اكًـْــبِــيـــلْ

هَكْدَاكْ أَنَا يَــاسِيديِ بْشُوقْ لَرْيَــامْ الْمَشْتَمْـــرَا عْلَى اسْفِيــكْ ادْمَـاهَــــا
بَـــالطّْعَنْ وَ الْقَـــنْصْ وْ الْقْـــتِيـــلْ

كَارْمَا تَتْخَتَّلْ للصِّيدْ زِينْ وَبْهَــــــــا وَ السَّرْ افْحَـالَتْ السّْرُورْ اكْسَـاهَــا
وَالْحْـــــــــرُوفْ اصْــوَارَمْ وَتْــقِيـلْ

الحربة
السَّــاقِي وَكَّضْ لَرْيَــامْ رَدّْ بَـــالَكْ لَلنُّوبَــا لاتْغِيبْ عَنْ مُــــولاهَــا
كُــبّْ يَــا سَــاقِي رَاحْ الِّيــلْ

 

القسم الثالث
جَـــاوَبْ السَّاقِي بَعْدْ ادْوِيتْ
قَــــــــالْ لِّي نَصْبَرمَـــــاكًدِّيتْ
يَــــــاهْمُومْ اشْكًايَــا

وِينْ مَـــــــــاصَدِّيتْ وُشَكًـِّيـــــتْ
انْظَرْ بَـــــابْ الْمُوتْ اعْيِيتْ
بَــــاحْ سَرّْ اهْوَايَــا

وَالنّْــــــــوَاجَلْ مَنّْهَــــــــا نَكْوِيـــــتْ
لامَنْ انْشَفُو كَـــــــــــانْ ابْكِيتْ
لَلْكْرِيمْ اشْكَــــــــايَــــا

كِيفْ نَصْبَرْ مَنْ غِيرْ اصْبَرْ وَ النّْوَاجَلْ عَطْفَـــتْ بَقْوَاسْهَـــا لْمَنْ وَلاهَـــا
فُـــوقْ وَجْـــنَــاتْ اعْلَى التَّكْلِيـــلْ

لُو كْشَفْ قَلْبِي لِكْ اغْطَـــاهْ مَــاتْطِّيقْ اتْخَقَّقِ كِيَّــاتْ لِعْتُ مَعْتَـاهَـــا
مَــا شْكــــَا دُونْ اسْبَابْ اعْلِيـــلْ

كُلّْ مَجْـرُوحْ ايْصِيبْ ادْوَاهْ وَاّْلدِي مَنّْهُــمْ اجْـرَاحُ ايْعَـــزّْ طَبّْ ادْوَاهَـا
لُــو اضْحَى بِهْ الْعَمْــرْ اطْــوِيــــلْ

لُو احْضَرْتْ مْعَ عَرْبْ اهْــلالْ مَــانْرَوَّحْ هَــادْ الشِّي مَنْ اجْرَاحْ يَـــامَكَـْوَاهَــا
حَــرّْ مَـنْ حَـــــرّْ اصْــبُـوبْ انْيـــلْ

اَشْ نَطْفِي وَاشْ انْبَــرَّدْ عِدْلِي مَنْ شَعْلَتْ نَــارُ  مَنْ النّْسَـا وَطْفَـــاهَــا
مَــالْهَـا عَلْ لَعْضَــا تَحْــوِيــلْ

حُرْمْتَــكْ سَــاِقِيكْ ارْفَـــــقْ بِهْ فَـاتْ قَيْسْ الْفَــايَتْ هَــوْلُ اغْرَايْــبُ عَدَّاهَــا
مَـــايْضَـاهِي لُ حَـدّْ اخْـــلِيـــلْ

الحربة
السَّــاقِي وَكَّضْ لَرْيَــــــــامْ رَدّْ بَـــالَكْ لَلنُّوبَـــــــــا لاتْغِيبْ عَنْ مُــــولاهَـــا
كُـــبّْ يَـــــــا سَــــــاقِي رَاحْ الِّيـــــــــــلْ

القسم الرابع
قُلْتْ يَا سَـــــــــــــاقِي شَدّْ احْزَامْ
لاتْعَـــــــــاتَبْ نَفْسَـــكْ بَمْـــــــــــلامْ
خُدْ لِكْ ايفَـــــــادَا

فْعَلْ مَـــــاَ فَعْلُ هَلْ لَغْـــــــــــــرَامْ
حِينْ تَعْطَفْ عَنْهَـــــــــــا لِيَّــــــامْ
فَرْحْهُمْ يَتْــــــــــزَادَا

اَشْ مَنْ حَضْرَا دُونْ ارْيَـــامْ
وَاشْ مَنْ صَفْرَا دُونْ امْـدَامْ
لَلْقْــــلُوبْ الْـــدَادَا

مَتَّعْ ابْصَـارَكْ وَاتْــزَهَّى وُشُفْ لَحْبَـابْ فْمَـا يَهْــوَى الْقَلْبْ وُيَشْتْهَـاهَا
فَالنّْـعَــايَـــــمْ وَالشَّـــمْــعْ اشْعِيــلْ

اَشْ بَــاقِي لِكْ مَنْ تَـنْكَـالْ لِيلَتْ الْفَرْجَـا مَعْـلُومَـا ابْفَــرْحْهَـا وَتْـــنَـاهَــا
مَـايْحَــضْـــرْ امْـــعَهَـا تَهْـــوِيـــلْ

البْنَــاتْ اغْنَايَمْ وَسْرُورْ كِيفْ يَسْهَى عَقْلَكْ وَتْتِيهْ عَنْ احْضَرْتْ احْمَــاهَـا
مَــــاكْــــرَهْ مَــــصْـــــــريِ فِيــــــضْ النّــــِيـــلْ

قَلْبْ مَنْ كَـانْ اهْمِيمْ اشْغِيبْ كَانْ شَاهَدْ مَنْ يَنْسَى لِيعْتْ الْقْضَى وَلْضَاهَـــا
وْ مَـــا فْسَــــــاعْــــــتْ الْهْنَــا تَــبْدِيـــلْ

فَاتْ قُولْ اصْحِيحْ اسْمَعْنَــاهْ لا تْـبَـــدَّلْ سَـاعَت لَهْنَـا ابْتَـــعْبهَا وَشْقَــاهَــا
وَمَــا تْكُـونْ اعْلَى الْوَجْــــدْ ابْخِيــــلْ

كِيفْ يَحْــضَرْ عَقْـــــلَـكْ وَيْغِيبْ وَ الْعْوَارَمْ قُــــــدَّامَكْ كُــلّْهَا ابْـــمَـا يَعْنَـاهَـا
هِيـــــبْ نَفْسَـكْ للـطُّــوعْ اتْمِــــيــلْ

الحربة
السَّـاقِي وَكَّضْ لَرْيَــــامْ رَدّْ بَـــالَكْ لَلنُّوبَـــــــــا لاتْغِيبْ عَنْ مُــولاهَـــــا
كُـــبّْ يَـــــــا سَـــاقِي رَاحْ الِّيــــلْ

القسم الخامس
مَــــــــاخْطِيتِي حَاشَــــا وَ اللهْ
غِيرْ خَاطَبْتِي مَنْ تَهْوَاهْ
زَادْ بِـــــــــكْ اوْلاعَــــــــــــــــا

والزّْهُو مَسْطُورْ انْضَمْنَــاهْ
وَالْهْوَى سَـــــــاقِي سَمِّنَــــــــاهْ
وَالْوْدَنْ سَمَّـــــــــــاعَـــــــــــا

زِدْ غَدَّرْ كَـــــــــــاسَكْ وَلْقَــــــــاهْ
لِيلْنَــــــــا بَــــــــالْفَرْحْ اغْنَمْنَـــاهْ
جَلّْ طِيبْ اخْلاعَــــــا

هَيَّـجْ السَّـاقِي دَكْرْ اغْنَـاهْ رَادَفْ اعْـرَاقِي فَعْــرَاقِي وُلِيــلْتُ حَيَّــاهَـا
سَـــارْ يَسْقِـي رَفْــقْ وُ تَمْهِيــــلْ

شَاعْ لَخْمَرْ هَيَّجْ الْبْنَاتْ بَــاحْ وَفْشَـــا مَكْنُونْ اسْرَارْهَــا وُطَـارْ احْيَــاهَــا
لاحْ طِيــرْ الْحُسْــنْ الكُبِّــــيـــلْ

دِيـــكْ بَكَـْرَايَحْهَــا تَنْشَدْ دِيـــكْ بَقْصَايَدْهَــا تَــلْــفَضْ وُ الخْـرَى بَغْنَاهَــا
كَـانْغَـــمْـــــتْ الْمَيَــا وَ الدَّيْــــلْ

تَـاكْ لَفْجَـــرْ وَالِّيلْ انْشَـالْ وَ الْطْيَــارْ اتْسَبَّـحْ بَصْوَاتْهَــا الْمَنْ انْشَاهَـا
وَالْغْصَــانْ اكْسَـاهَـا اتَخْبِيــلْ

هَبّْ مَنْ جُـوّْ الْفَلْكْ انْسِيـــمْ بَعْدْ صُولَتْ لَمْكَـْـامْ الْبِينْ للْوْدَاعْ ادْعَـاهَـا
كَـايـْــنَادِ بَــــالْعَـــزْمْ ارْحِيــلْ

كُلّْهَـا وَدَّعْ مَــنْ يَهْـوَاهْ لِــهْ قَــالُ لِيلَتْــنـا يَــالشَّـــيْــخْ لاتَـنْسَــاهَـــا
زِدْنَـا فَــوْصَــافَــكْ تَــبْجِـــيــــلْ

الحربة
السَّــاقِي وَكَّضْ لَرْيَــامْ رَدّْ بَــالَكْ لَلنُّوبَا لاتْغِيبْ عَنْ مُـولاهَـــا
كُــبّْ يَـــا سَــاقِي رَاحْ الِّيــلْ

القسم السادس
خُدْ لَكْ سَـــاقِي يَامَنْ رَادْ
مَنْ ابْدِيــــــعْ اجْوَاهَــــــرْ لَنْشَــــادْ
مَــــــاخْفَـــــا نَشَّـــــــــادُ

عَبْدْ الْجَلِيلْ اتْبَرْ لَنْشَــــادْ
فِي مْدِينْ الْحَمْـــرَا يُجَـــــــــــادْ
بِينْ دُوكْ وُهَـــــــادُ

يُومْ تَدْفَعْ لَلْحَرْبْ اعْكَـادْ
وَالّْفَاضْ عْلَى الْحْكْمْ اشْهَــــادْ
وَيْهْزَمْ جَحَّــــــــــــــــادُ

وَالْشْيَاخْ ابْلَصْنَافْ ادْرَاجْ بَعْضْ عَنْ بَعْضْ وُمُولْ الْمُلْكْ كِيفْ رَادْ اسْقَاهَـــــا
قَـالَتْ ارْبَــابْ اهْـلْ التَّـاوِيــلْ

الْعْقَلْ نُـورْ امْنْ التَّنْوِيرْ وُيْسْعَــدْ مَنْ فَــازْ ابْدِيــنُ افْــرَايْضُ وَدَّاهَــا
دَاكْ رَبْـــــــحُ وَ الْفَضْـلْ احْصِيــــــــــــــــلْ

مَنْ السَّهْوَى يَقَّضْ جَفْنَكْ يَــا الطَّـافَحْ رَدّْ اعْلَى الْعِيبْ كَلْخْتَكْ لَجْوَاهَــا
يَـا مَنْ اغْشَـى دَهْنُ تَخْبِيـــلْ

مَـادْعِيتْ ابْدَعْـوَى مَفْهُومْ سَـاقَطْ الدَّعْـوَى وَ النَّفْخَـا ابْنَــاسْهَــا شُوَّاهَا
فَــدّْ رَاقِـــي وَ الْعَقْـــلْ اعْــــقِيـــــلْ

رَبّْنَـا عَلْ لَعْبَـادْ ايْــتُوبْ وِيرْحَمْنَــا بَرْحَـــمْتُ وِيمْحِي اوْزَارْ اخْطَـاهَــا
حَيّْ سَـامَعْ بَــــــالْفَضْلْ اجْزِيــلْ

وَالسّْلامْ الاَمْتْ لَشْرَافْ وَالْشْيَـاخْ وْطَلْبَا وَعْلَى اهْلَ التّْنَا وَنْبـَــاهَــا
عَـــــــدّْ مَـا حَفْــلَتْ بِــــــهْ احْفِيــلْ

الحربة
السَّــاقِي وَكَّضْ لَرْيَــامْ رَدّْ بَـــالَكْ لَلنُّوبَـــا لاتْغِيبْ عَنْ مُــــولاهَـــا

كُـــبّْ يَـا سَــاقِي رَاحْ الِّيــــلْ