قَصِيدَة الرَّعْدْ
للشيخ محمد بنسليمان             مبيت رباعي        

القسم الأول
اَلرَّعْدْ زَامْ طَبْلُ مَنْ بَعْدْ اَكًـْــنَـاطَرْ اَلسّْمَايَمْ
وَاَلْبَرْقْ سَلّْ سِيفُ وِ يْخَبَّــــلْ فِي خْيُـولْ لَمْزَانْ
وَاَلرِّيحْ فَــارْسْ اِيْشَـــالِي
عَنْ اَعْكًـَابْ اَلْعَلْفَـــاتْ اَعْلَى اَلْوْغَا مْشَمَّرْ

لَقْزَاحْ شَـــدّْ بَنْدُ لَلْفَرْجَــا عَسْكْرُ اَتْـــلاَيَــــمْ
وَحْــرَكْ بَلْمْطَــرْ لَلْبِيــدَا حَتَّى اَجْـرَاتْ وِيــدَانْ
قَـــلْبِي ابْحبّْهَـــا سَـالِي
كُلّْ فَجّْ اَصْبَحْ مَنْ ذَاكْ اَلضّْبَــــا امْخَضَّرْ

وَبْطَــايَحْ اَلنّْــــوَاوَرْ تَتْصَوَّغْ مَنّْهَــا اَنْسَــايَمْ
فَصْلْ اَلرّْبِيعْ هَذَا مَــا كِيفُ فَالزّْمَــانْ سُلْطَــانْ
وَعْلَى اَجْمِيــعْ لَقْيَـالِي
عَـــبْقْــرِي لاَبَسْ مَنُّ دَايْــــرَا مْوَبَّــــــرْ

امْبَسَّمْ التّْنَـايَــا مَشْرُوحْ وُ جَــادْ بَـــاَلْغْنَــايَمْ
بَاَلْوَرْدْ وَالزّْهَرْ عَلْ لَطْيَــارْ النَّـــاشْدَا صْبِيهَـــانْ
فَرْيَـــاضْ امْحَتْفَلْ عَـالِي
بِينْ وَرْدَاتْ النَّحْــلاَ شَهْــــدْهَــــا تْعَمَّـــرْ

الحربة
اَصَـــاحْ زَارْنِي مَحْبُوبِي يَامَسْ كُنْتْ صَايَمْ
شَهْدَ قْطَعْتْ وَجْنِيتْ اَلْوَرْدْ قَالُو كْلِيتْ رَمْضَـــانْ
مَهْجُورْ كُنْتْ مَـــــا دَالِي
يَـاحْبِيبْ اَلْخَـــــــاطَرْ يَاكْ اَلْمْرِيضْ يَفْطَرْ

القسم الثاني
مَنْ قَـــلّْتْ اَلزّْيَـــاٍرَا مَتْوَهَّنْ سَـــــاخَفْ لَكًـْوَايــَمْ
مَعْـدُومْ بَــــاَلْجْفَــا وَحْمُــــــولُ مَتْكَلْفَـا بْـالَبْــدَانْ
وَاَلْيَوْمْ كِيـفْ يَجْــــرَا لِي
وَالـــدّْوَا قُدَّامِـــي وَلاَ نْطِيـــقْ نَصْبَـــــرْ

اِلَى يْجُـــودْ لِي بَالنَّظْرَا لَحْظْ اَلْبْهَــــا اَلنَّايَمْ
زِدُ عْلَى وْدَادْ اَلشَّهْــــدَا لَمْجَـــالْسَــــا فْلَمَـــانْ
وَاَلْغِـــــــيرْ لِيسْ يَزْهَـــــــــا لِي
بَــالصّْفَـا عَشْقِي حَاشَـــا فَــالْمْلِيحْ نَغْدَرْ

حُجَّا عْلَ هَلْ اَلدَّعْوَى مَا نَصْغَ كْلاَمْ لاَيَمْ
قَيْسْ اَلزّْمَـانْ هَذَا يَــا مَنْ لاَ حَــاطْ بِهْ غِيـــوَانْ
بَــاَلزِّينْ يَنْشْطَنْ بَــــالِي
وَاَلْبْهَــــا مَنْ سِيفُ دَمِّــــي غْزِيرْ يَقْطَرْ

مِنْ غِيرْ حَالْ تُوجَدْنِي سَاهِ بَالْشْوَاقْ هَايَمْ
تَرَى اَنْغِيبْ تَرَى نَحْضَرْ حَتَّى تْقُـــولْ سَكْـرَانْ
فَـــالْحُبّْ هَكْذَا حَـــالِي
غِيرْ سَلَّــمْ هَيَــــا مَـــــنْ لاَ بْلاَكْ وَعْــدَرْ

الحربة
اَصَـــاحْ زَارْنِي مَحْبُوبِي يَامَسْ كُنْتْ صَايَمْ
شَهْدَ قْطَعْتْ وَجْنِيتْ اَلْوَرْدْ قَالُو كْلِيتْ رَمْضَـــانْ
مَهْجُورْ كُنْتْ مَـــــا دَالِي
يَـــــــاحْبِيبْ اَلْخَـــــــاطَرْ يَاكْ اَلْمْرِيضْ يَفْطَرْ

القسم الثالث
اَمَــــا سْهَرْتْ بَهْوَايَــــا وَنْتَيَــــــا اَسْلِيمْ نَــــايَمْ
وَمَـا بْكِيتْ سَــــاعَتْ نَغْتَاضْ وَاَلْقَلْبْ لِكْ صَفْـوَانْ
وَمَـــا نْهَـلـَّتْ اَنْجَـــــالِي
وَ اَلْقْلِيـــبْ اَمْهَيَّــــــجْهُـمْ بَـالْبْكَـا مْكَــــــدَّرْ

اَمَــا اَمْشَـايْخِي بِينْ اَقْدَامَكْ لاَحَتْ اَلْعْمَايَمْ
لَوْ كَــانْ كَــانْ قَلْبَكْ نَصْرَانِـــي لاَغْنَـاهْ يَلْيَــانْ
مَفْقُـــودْ رَاحْتِـــي مَــالِي
يَــاكْ تَعْرَفْ حَـــــالْ اَلْمَهْجُــــورْ لاَشْ تَهْجَــرْ

اَعْيِيتْ مَــا نْعَزَّمْ مَـــا نَفْعَتْ فَالْهْوَى عْزَايَمْ
ابْلاَ شْــــوَارْ غِيـــرْ اَنْخَمَّـــمْ فْكُلّْ سَـــاعْ دِيـــوَانْ
بَالطُّولْ بَــــــارْتْ اَحْيَــالِي
يَــاكْ عَنْــــــدْ اَلْمُــولَى تَدْبِيرْنَـــا اَمْدَبَّـــرْ

هَذَا اَشْحَـــالْ وَنـا قُرْصَانِي عَاجَزْ اَلْغْنَايَمْ
وَاَلْيُومْ سَــــاعْدُ رِيحْ اسْعِيدْ عْلَى اَلْوْصَــالْ عُوَّانْ
جُوَّالْ خَــــارَجْ لَلْمَـــالِي
رَايْسُ عَلْ لَغْنَـايَـــمْ خَـــرّْجُ اِيـــدُوَّرْ

الحربة
اَصَـــاحْ زَارْنِي مَحْبُوبِي يَامَسْ كُنْتْ صَايَمْ
شَهْدَ قْطَعْتْ وَجْنِيتْ اَلْوَرْدْ قَالُو كْلِيتْ رَمْضَـــانْ
مَهْجُورْ كُنْتْ مَـــــا دَالِي
يَـــــــاحْبِيبْ اَلْخَـــــــاطَرْ يَاكْ اَلْمْرِيضْ يَفْطَرْ

القسم الرابع
رَسَّـــــا مْقَــــادْفُ فَــــالْمَرْسَــــــا وَتْكَلّْمُ اَزْرَايَـــــمْ
خَـــــرْجُ اَهْلْ اَلْمْدِينَــــا قَـــالُ هَذَا الــــرَّايَسْ اَفْــــلاَنْ
نَـــــادَا سْرُورْهَـــــا فَـــــــالِي
فِي سْوَاقْ اَلْفَرْجَـــــاتْ اَغْنَــــــايْمُ اَتْشَهَّــــرْ

قَلْبِي اَكْبِيرْ مَشْرُوحْ اَصْغِيرْ اَلرَّاسْ فَالْوْلاَيَمْ
طَبْعِي اَرْقِيقْ فَـانِي مَثْلِي فالْحُبّْ لِيسْ يُهَــــــانْ
حَتَّى اَنْـــــدَرَّكًـْ اَخْيَــــــالِي
عَـــادْ يَنْـــدَمْ مَــنْ كَــانْ اَفْعِـــــيبْنَــا اَمْكَثَّــــرْ

صَافِي مَنْ اَلْعْيُوبْ وُ لاَ اَنَا صَاحَبْ اَلْجْرَايَمْ
عَمْرِي مَا نَّـــــافَقْ اِنْسَــــــــانْ وُ لاَ كْلِيتْ رَمْضَــــانْ
اِلاَّ اَشْطَـــــــارْتْ اَشْغَـــــــالِي
لَلْغْنِــي نَـــــسْتَــغْــفَــرْ فِيمَـــا جْنِيـــتْ يَغْـــفَـــرْ

اَرَافَعْ اَلسّْمَـــــــوَاتْ اَجْعَلْنِي لَلصّْــــــــلاَحْ رَايَـــمْ
بَدَّلْ سِيْتِـي بَــالْحَسْنَـــاتْ وُ لاَ نْــــــــرُومْ شَيْطَــــــانْ
وَلاَ تْخِيَّـــــبْ اَسْئَـــــــالي
يَـــالْغَفَّـــارْ اَلْقَـــلْبْ مَنْ اَلْـــــــوْزَارْ اَتْطَهَّـــرْ

الحربة
اَصَـــاحْ زَارْنِي مَحْبُوبِي يَامَسْ كُنْتْ صَايَمْ
شَهْدَ قْطَعْتْ وَجْنِيتْ اَلْوَرْدْ قَالُو كْلِيتْ رَمْضَـــانْ
مَهْجُورْ كُنْتْ مَـــــا دَالِي
يَــاحْبِيبْ اَلْخَـــــــاطَرْ يَاكْ اَلْمْرِيضْ يَفْطَرْ

القسم الخامس
لَوْ لاَ اَسْمَاحْتُ جَفْنِي فَبْحُورْ اَلذّْنُوبْ عَايَمْ
فِي بَابْ رَبّْنَـــا نَسْعَى لَذْنُوبِـــي اَعفُ وُ غُفْــرَانْ
فَــــالَّوْلِــي مْـــــــعَ اَلتَّـــالِـــــي
وَالذّْنُوبْ اَلْفَــــايَــــــتْ وَاللِّي عَــــادْ يَصْــــدَرْ

اَحَـــــافَظْ اَلْقْصِيدَا زِدْ التُّــــقْلاَ عْلَى اَلْبْهَــــايَمْ
وَحْضِي اَعْقُودْ لَهَلْ اَلدَّعْوَاتْ اَلنَّــــــاكْرِينْ لَحْسَــانْ
عَنّْهُــــــمْ تَبَّــتْ اَمْقَـــــــالِي
غُلْبْ صَـــــــافِي اَلدَّاعِي مَـا يْصِيبْ يَنْكُــــــرْ

فِي ضَامْتْ اَلشّْطَارَا كِيفْ اَجْرَى لُ يْعُودْ ضَايَمْ
اَنْزَلْتْ فَــــالسّْبَــــاعِي وَكْلاَبُ حَــاصْلاَ فْلَرْكَـانْ
وَبْيَــــادْقِي عْلَى اَلتَّــــالِي
بَـــانْ غُلْبِـــــــي مَــــنْ قَــــــالْ يْمَنّْــــــعُ يْنَبَّـــــرْ

تَرْسَـــانْ بْرَبْعَـــا فِيــدِيَّــــا تَنِّيتْ بَــــــالدّْغَــــــايَمْ
وَضْوَاصْهُـمْ لَمَـــــا فِيدِي وَكْـــــدَاكْ زُوجْ لِصَـــانْ
وَالْمَـــــــالْ جَاوَرْ اَشْمَــــــالِي
غِيـــــرْ يَخْــــرَجْ وَنْطَـــــــرَّقْـــلُ وُ لاَ نْوَفَّــــــرْ

عَـدْرَا مْخَنْطْـــــــرَا ظَهْرَتْ بِهَــــــا لَلزّْهُو اَعْلاَيَمْ
سَمِّيتْهَـــا بْعَسْلْ اَلشَّهْدَا فَرْيَـــــــاضْ بَنْ اَسْلِيمَــــانْ
تَسْقِي اَلْبَعْضْ بَمْصَـــالِي
خُــــــــدْ هَيْفَـــــا لَلْعَـــاشَقْ كَــــاسْهَـــا تْعَمَّــــرْ

وَسْلاَمْ رَبّْنَـــــا مَــــــا يَتْنَهَّى لَدّْهَــــــــاتْ دَايَــــــمْ
بَالْوَرْدْ وَاَلزّْهَـرْ وَالنَّسْــــرِي وَ جْمِيعْ كُلّْ سُوسَـــانْ
نَدّْ وُ عْبِيــــــــــــــرْ وَغْــــــــوَالِي
وَالْمْسُوكْ وُجَـــــاوِي وَجْمِيــــــــعْ مَـــــا تْعَطَّـــــرْ

الحربة
اَصَـــاحْ زَارْنِي مَحْبُوبِي يَامَسْ كُنْتْ صَايَمْ
شَهْدَ قْطَعْتْ وَجْنِيتْ اَلْوَرْدْ قَالُو كْلِيتْ رَمْضَـــانْ
مَهْجُورْ كُنْتْ مَـــــا دَالِي
يَـــــــاحْبِيبْ اَلْخَـــــــاطَرْ يَاكْ اَلْمْرِيضْ يَفْطَرْ