قصيدة اَحْلِيمَا
نظم الشيخ محمد بلكبير

القسم الأول
آهْ عَنْ قَلْبِي يَشْكِي مَنْ اَلْهِيبْ لَغْـــرَامْ
آهْ عَنْ قَلْبِي نَارْ اَصْوَاعْقُ اَضْرِيمَــا
آهْ عَنْ قَلْبِي لاَ رَاحَـــــــــا اَلْكَا فْلِيَّـــامْ
اَمْصَايْبُ عَلْ لَنْوَاعْ اَمْقَوّْمَا اَحْسِيمَــا
آهْ عَنْ قَلْبِي راهْ اَضْحَى يْسِيرْ لَوْهَـــامْ
طَالْ تَعْبُ مَسْكِينْ اُمَاجْنَا اَجْرِيمَــــــــا
لِهْ لَحْوَادَثْ كَاتَسْقِي كْيُوسْ لَنْقَـــــــــــامْ
مَا هْنَا قَلْبِي مَنْ لَمْصَايَبْ اَلْأَلِيمَـــــــــا
طَالْ وَعْدَكْ يَا قَلْبْ اَحْكِ اَضْغَاتْ لَحْلاَمْ
اَمْشَاتْ رُوحْ اَلْحُبْ اُخَلاَّتَكْ اَلزّْعِيمَــــــا
حَتّْ لَوْدَاعْ اَنْسَاتُ يَا زْهَرْتْ لَجْسَــــــــامْ
قُلْتْ لِهَا بَفْرَاقَكْ حَالْتِي اَسْقِيمَـــــــــــــــــا

الحربة
اَحْلِيمَا شَعْلَتْ نَارِ وُزَادَتْ اَضْرَامْ
يُومْ سَرْتِي مَنْ غِيرْ اَوْدَاعْ يَا حْلِيمَا

القسم الثاني
اعروبي

لَفْرَاقْ اَصْعِيبْ يَالِّي مَا خَافَتْ لُـــــــومْ
وِيَّامُ يَالْجَافْيَانِي مَدْمُومَـــــــــــــــــــا
لَفْرَاقْ اَدُرْتْ اَلْبْهَا مَجْمَعْ لَهْمُـــــــــومْ
وَفْزَعْتُ يَا سْرُورْ قَلْبِي مَوْهُومَـــا
اَفْرَقْتِي يَا بْدِيعَتْ اَلْحُسَنْ اَلْمَتْمُـــومْ
وَتْرَكْتِي فَالْحْشَا اَلنَّارْ اَلْمَضْرُومَا

وَنَيَا بِكْ مَا سْخِيتْ اَحَلُّومَــــــــا

كِيفْ يَمْكَنْ نَسْخَى بِكْ اَعْلاَجْ لَرْوَاحْ
كِيفْ بَعْدْ اَلْفَرْقَا تَزْهَى كْيُوسْ رَاحِي
كِيفْ بَعْدْ اَفْرَاقَكْ قَلْبِي اَلْيَوْمْ يَرْتَــــاحْ
كِيفْ يَمْكَنْ لَلنُّومْ اَتْعَنّْقُ اَلْمَــــــــــاحِي
كِيفْ يَتْهَنَّا قَلْبْ اَمْجِيْحَاهْ لَلْمَــــــــــاحْ
آهْ عَنِّي فَارَقْتْ اَلزَّايْدَا اَجْرَاحِـــــــــي
آهْ عَنِّي فَارَقْتْ اَلْجَارْحَا ابَنْيـــــــامْ
سَاكْنَا لِي فَحْشَايَا جَوْهْرَا اَيْتِيمَــــا
تَاجْ لَبْهَا لَغْزَالْ اَلصَّايْلاَ فْلاَكَـــــامْ
اَحْبِيبَتْ اَقْلِبِي مَا وَدَّعْتْنِي اَلرِّيمَـــا

الحربة
اَحْلِيمَا شَعْلَتْ نَارِ وُزَادَتْ اَضْرَامْ
يُومْ سَرْتِي مَنْ غِيرْ اَوْدَاعْ يَا حْلِيمَا

القسم الثالث
اعروبي

يَوْمْ اَجْفَاكْ اَلرِّيمْ يَوْمْ اَدْجَا لَهْمُــومْ
دَهَّلْ لَعْقُولْ يَا اَلدُّرَّا اَلْمَبْهُومَــــــــا
وَاَلرِّيقْ اَجْفَا اَمْنَابْعُ مَنْ بَعْدْ اَلْعُومْ
وَالرُّوحْ اَخْضَعْتْ لَلْخْبَارْ اَلْمَدْهُومَا
لاَهَرْبَا عَلْ اَلْكَاتْبَا يَا رُوحْ اَلْقُـــــومْ
وَاحَقّْ اِيَّامْ بِكْ كَانَتْ مَبْسُومَــــــــــا

إِلَّا كِيّْ اَلجّْفَا اَصْعِيبْ اَحَلُّومَــــــــا

حَرّْ كِيّْ اَجْفَاكْ اَسْرَى فَلْعْضَا وُلاَهَابْ
سَاكَنْ اَسْكَنْتِيهْ اَبْلَشْمَايَلْ اَلْعْجِيبَـــــــــا
مَا نْوِيتْ وُلاَ ظَنِّيتْ اَلجّْفَا اَفْلَحْسَــــــابْ
بَعْدْ كَانَتْ بِكْ اَيَّامِي فْعَزّْ هِيبَـــــــــــــا
هَاكْذَ يَا لَحْبِيبَا طَابْ سَاكْنِي طَــــــــابْ
وُلاَ طْبِيبْ اَوْجَدْتّْ اَلْدَايَا وُلاَ طْبِيبَـــــا
كَلّْ صَبْرِ ضَاقْ اَنْطَاقِي جْفِيتْ لَمْنَامْ
مَا نْفَعْنِي لَجْفَاكْ اَمُولْتِي اَعْزِيمَـــــــا
يَاكْ يَحْسَنْ عَوْنِي رَانِي يْسِيرْ لَغْــرَامْ
وُبَالْمْحَبَّا يَا مُولاَتِي اَنْتِ اَعْلِيمَــــــــــا

الحربة
اَحْلِيمَا شَعْلَتْ نَارِ وُزَادَتْ اَضْرَامْ
يُومْ سَرْتِي مَنْ غِيرْ اَوْدَاعْ يَا حْلِيمَا

القسم الرابع
اعروبي

يَاكْ اَمَلِكْتْ اَلْجْمَالْ اَفْقَدْتّْ اَلْيُـــــــــــومْ
اَمْجَالَسْ بِكْ كَانَتْ اَفْكُلّْ اَشْهُومَــــــــــــا
وِينْ اَلْخَزْرَا اَلْفَاتْكَا بَنْشَــــــــــاشَبْ رُومْ
تَرْمِي لَقْلُوبْ يَالرِّيمْ اَلزَّهْزُومَــــــــــــــا
خَانْ اَلدَّهْرْ اَرْيَاضْ لَمْحَاسَنْ حَلُّــــــــومْ
وَغْشَاكْ اَمْغَيَّبْ يَالشَّمْسْ اَلْمَسْهُومَـــــــا

نَارَكْ مَا بَاتْشِي اَتْبَرْدْ اَحَلُّومَــــــــــا

مَا بَرْدَتْ نَارْ اَلجّْفَا وُلِيسْ طـَــــــــــــــــايَقْ
وَالَجْفَا نِيرَانُ يَا مُولْتِي اَحْرِقَــــــــــــــــــا
فَلْمْنَامْ اُ يَقْضَا قَلْبِي لِكْ شَـــــــــــــــــــايَقْ
وُالْجْوَارَحْ لُوصَالَكْ كُلّْهَا اشْرِيقَــــــــــــا
بَارْتْ اَحْيَالِي يَا بَدْرْ اَلْبْهَا اَلْفَــــــــايَــقْ
مَا اَلْقِيتْ اَصْدِيقْ اَلوَعْدْ وُلَا اصْدِيقَــا
وُالْغْرَامْ لَخْيُولُ اَجْيُوشْ اَرْمَـــاتْ لَحْزَامْ
مَا تْقَاتْ اَلْعَارْ وَلَا خَافْتْ اَلْهْجِيمَـــــــــا
كِيفْ نَعْمَلْ وَاشْ اَلْمَعْمُولْ وَالجّْفَا عَـــامْ
بَرّْدِي هَاذْ اَلنَّارْ وُبَرّْدِي اَعْزِيمَـــــــــــا

الحربة
اَحْلِيمَا شَعْلَتْ نَارِ وُزَادَتْ اَضْرَامْ
يُومْ سَرْتِي مَنْ غِيرْ اَوْدَاعْ يَا حْلِيمَا

القسم الخامس
اعروبي

غَرَّدْتّْ مْعَ اَطْيَارْ عَشْقِي يَـــــــا حَلُّومْ
وَدْوِيتْ بْمَا اَدْهَا اَلدَّاتْ اَلْمَسْقُومَــــــــا
وَلءغِيتْ اَلْحَاسْدِينْ وَلْغِيتْ اَهْلَ اَلُّومْ
مَالِي فَسْوَاكْ غَرْضْ خَيْلِي مَلْجُومَـــا
اَنَا مَنْ هَلْ اَلْحُب وَالْوَاشِي مَدْمُـــــــومْ
طَاعَتْ لَمْحَاسَنْ اَغْزَالِي مَلْزُومَـــــــــا

عَتْقِنِي مَنْ اَضْنَا جْفَاكْ اَحَلُّومَــــــــا

يَابْدِيعَتْ لَجْمَالْ اُيَارْيَاضْ لَفْهَـــــــــــــــــــــــامْ
اَهْلاَلْ اَتْجَلاَ وَكْوَاكَبُ اَحْجِيمَـــــــــــــــــــــــــا
اَنْغَمْتْ اَسْرُورِي يَا مُولْتِي فْلَرْيَــــــــــــــــــــامْ
اَزْهَرْتْ اَحْيَاتِي نَارْ اَلجّْفَا اَعْظِيمَــــــــــــــــــــا
اَمْلاَكَتْ لَبْهَا فَعْرَابْهَا وُلَعْجَـــــــــــــــــــــــــــامْ
اَلدَّهْبْ اَلْيَبْرِيزْ اَتَاجْ كُلّْ رِيمَـــــــــــــــــــــــــــا
اَرْيَاضْ اَلْحُسْنْ اَلْبَاهِي اَلْفَايَقْ اَلتَّـــــــــــــــــــامْ
لِكْ رَانِي مَكْسُوبْ اَنَا بْغِيرْ قِيمَـــــــــــــــــــــــا
مَتْعِينِي فَحْيَاتِي بِكْ يَا بْدَرْ سَــــــــــــــــــــــــامْ
تَوّْجِينِي بَرْضَاكْ اُحَبّْسِيهْ دِيمَــــــــــــــــــــــــا
بِكْ نَزْهَى وَنْسَاوِي مَايْتِي اَلَّنْغَـــــــــــــــــــــامْ
وَالْطْيَارْ اَتْغَرَّدْ وَصْوَاتْهَا اَنْغِيمَـــــــــــــــــــــا
وَالرّْيَاضْ اضمْزَخْرَفْ بَبْهَـــــــــاكْ اَلزَّهْزَامْ
وَالْغْيَادْ اَتْصَافَحْ لَعْتَابَكْ اَلْكْرِيمَـــــــــــــــــــــا
بِينْ نَاسَك ْوَحْبَابَكْ زَاهْيَا فْلَرْسَــــــــــــــــــــامْ
بَارْزَا فَحْلِيكْ اُ فَحْلُولَكْ اَلضّْخِيمَـــــــــــــــــــــا
وَالْبْسَاطْ اَزْهَرْ اُحَفَّاظْنَا بْلَنْظَـــــــــــــــــــــــــامْ
كَايْشَالِي فَرْحَانْ اَبْجُودَكْ اَحْلِيمَــــــــــــــــــــــا
وَالسّْرُورْ اَرْقَصْ فَالْمَجْلِسْ وَالْبْهَا هَــــــــــــــامْ
بِهْ زْغَرْتَتّْ اَكْيُوسْ اَمْدَامْنَا اَعْوِيمَــــــــــــــــــا
هَكْذَا هُوَّ اَلْعَشْقْ اَمُولْتِي وُلَهْيَـــــــــــــــــــــــــامْ
وُهَكْذَا فَعْلُ بَهْلُ كِيّْتُ اَقْدِيمَـــــــــــــــــــــــــــــا
وُلِكْ نَهِّيتْ اَلْحَالْ اَمُولْتِي فْلَقْسَـــــــــــــــــــــــامْ
هَايَبْ اَسْلاَمِي زَهْرْ اَمْبَاسْمُ بْسِيمَــــــــــــــــــــــا
عْلَى قْدَرْكْ اَلْعَالِي وَمْيَاتْ ءَالَفْ سْــــــــــــــــــلاَمْ
كُلّْ يُومْ اَنَّادِي تَحِيّْتِي اَنْسِيمَــــــــــــــــــــــــــــــــا
وَالسّْلاَمْ اَلْنَاسُ مَهْدِي اَلْخَاصّْ اُعَـــــــــــــــــــــــامّْ
مَا شْدَاتْ اَطْيَارْ مْنَ اَقْفَاصْهَا اَهْيِيمَـــــــــــــــــــــــا
مَا خْفَا مُحَمَّدْ عَبْدْ اَلْشْرَافْ وَعْـــــــــــــــــــــــوَامْ
بَنْ اَلْكَبِيرْ اَزْهَارْ اَمْوَاهْبُ اَخْتِيمَـــــــــــــــــــــــــــــا
اَمَنْ اَحْلاَ يَوْمْ اَمْلَتْقَاكْ بِينْ لِيَّــــــــــــــــــــــــــــــامْ
يُومْ عِيدْ اَلْكُلّْ اَعْيَادِي  وُيَالرِّيمَــــــــــــــــــــــــــــــــا

الحربة
اَحْلِيمَا شَعْلَتْ نَارِ وُزَادَتْ اَضْرَامْ
يُومْ سَرْتِي مَنْ غِيرْ اَوْدَاعْ يَا حْلِيمَا