قصيدة فاطما
للشيخ أحمد الكًندوز           مكسور الجناح

الحربة
يَاتْـرَى تَعْطَفْ لِي وَتْزُورْ بَالرّْضَى مَرْكَاحِي
فَاطْمَــــــــــــــا دَمِيَّتْ لَبْطاحْ

القسم الاول
اَلْهْـوَى تِـيَّهْنِي وَالْحُبّْ زَادْنِي تَجْيَـــــــــــــــــــــاحِـــــــي
وَالجّْفَــــــــــــا زَايَدْ لِي تَكْـــلاَحْ

اَلاَّيَمْ حَــــــــــــــــــــالِي سَلَّـمْ رُحْ سَــــــالِي سَــــــــــــــاحِي
لاَتْـزِيدْ اَلْعَقْلَكْ تَجْيَـــــــــــــــــــاحْ

مَا بْحَالْ اَلْهَجْرَانْ عْذَابْ يَا سْبَابْ اَنْوَاحِـــــي
لِيسْ تُوجَدْ عَاشَقْ مَرْتَاحْ

لوُمْ وُلاَّ سَلَّمْ رِيحْ اَلْغْــــــــــــرَامْ هَـــــــــزّْ اَدْوَاحِــــــــــــي
سَبّْتِي شَاهَدْتْ اَبْلَلْمَــــــــــــاحْ

زِينَتْ اَلسَّـــــــالَفْ وَالْغُرَّا عْلاَجْ ضَرّْ اجْرَاحِـي
وُخَـــــالْ وَالشَّمَـــــــــــــا وَالدُّوَّاحْ

 

القسم الثاني
قَـالْ يَـنَـاسِيدِي بَسْيُوفْ صَدّْهَا زَادَتْ فَصْيَارِي اَجْرِيحْ * وَالشَّوْقْ زَادْنِي وَالْقَلْبْ اَلْمَكًـْــرُوحْ * مَنْ اَشْواقِي بَالْوَجْدْ انُّوحْ * وَالْهْوَى رَاكَبْ شَلْوْ اَجْمُوحْ * طَالْبْ اَلرُّوحْ * اَبْقِيتْ انُّوحْ * مَا نْفَعْ تَنْوَاحِي * فِي اَدْجَايَا وَمْسَا وَصْبَاحْ

القسم الثالث
قَـالْ يَـنَـاسِيدِي بَكْمَالْ زِينْهَا تَسْلَبْ مَنْ عَقْلُ اَرْجِيحْ * قَدّْ الرّْطِيبْ يَهْتَزّْ اُيَتْمَايَحْ * وُتِيتْهَا بَكْحَالُ نَاصَحْ * وَالْجْبِينْ اَهْلاَلُ وَاضَحْ * لَحْظْ وَاقَحْ * وَشْفَرْ جَارَحْ * سِيفْ زادْ اَكْفَاحِي * وَالْحْوَاجَبْ قَوْسِينْ اَنْصاحْ

القسم الرابع
قَـالْ يَـنَـاسِيدِي غَـنْجُورْهَا اَمْسَكًـَّمْ سَرّْ اَلْوَجْهْ اَلسّْمِيحْ * وَالْخَدّْ وَرْدْ قـانِي رَوْضُ طَافَحْ * تَاكًـْ غُصْنُ سَامِي لاَقَحْ * اَعْلَى الدّْوَامْ اَمْبَهَّجْ فَاتَحْ * خَالْ صَافَحْ زَنْجِي رَاجَحْ * اَلثّْغُرْ رِيقُ رَاحِي * فَاقْ عَنْ شَهْدَتْ كُلّْ اَجْبَاحْ

القسم الخامس
قَـالْ يَـنَـاسِيدِي وَالثَّغْرْ لُو اَتْبَسَّمْ يَنْبَا سَرُّ اَوْضِيحْ * وَالْجِيدْ جِيدْ دَامِي بِينْ اَبْطَاحُ * وَالضّْعُودْ اَضْيَاهُمْ لاَحُ * وَالصّْدَرْ نَهْوَى تَوْضَاحُ* اَعْقُولْ جَاحُ مَنْ تَفَّاحُ * أَفْضَمّْهُمْ اَصْلاَحِي * وَالْبَطْنْ دَمْقَسْ يَا فُصَّاحْ

الدريدكة

بَالرّْضَى وَكْمَـــــــــــــــــالْ اَلسَّلْوَانْ نَبْتْشَرْ بَفْرَاحِي
بَالْمْطــــــــارَبْ وَكْيُوسْ الرَّاحْ

وَالرّْبَابْ وُطَرّْ وُغَانِي اَفْصِيحْ فَالْكًـُـبَّــــــــــــــــاحِي
وَالْبْراوَلْ وَسْجـــــــــــــالْ اَمْلاَحْ

بِينْ يَاسْ اُنَسْرِي وَغْصَانْ يَرْقَصُ فَبْطـــــــاحِي
وَالْطْيَــــــــــارْ عْلَى كُلّْ اَدْواحْ

يَنْشَدُ بَطْبَـاعْ اَعْجِيبَا ايْجَاوَبُ تَوْشَـــــــــــــــــــــــــاحِي
فِي اصْوَاتْ اَلْغَاهُمْ اَفْصَــــــــــاحْ

هَزّْهُمْ اَسْرُورِي وَتْخَمّْرُ اَبْطــــــــــــــالْ اَلْقــــــــــاحِي
وَالرّْقِيبْ اَيْصادَفْ تَجْيَــــــاحْ

وَالْجْحِيدْ النَّاكَرْ فَغْيَاهَبْ اَلدّْجَا مَصْبَـــــــــــــــاحِي
اَحْدَفْتْ قَوْلُ مَا كَــايَصْلاَحْ

اَمْثِيلْ شِي حَرْفْ اَلاَّ يُقْرَى اَشْغَلّْتُ فَلْوَاحِـــــــي
اِيْسَــالْ مَنْ سَلْكُ كُلّْ اَلْواحْ

عَنْ اَصْفَايْتْ شَعْرِ يُوجَدْ هْلَ اَلْهْوَى شُرَّاحِي
فاَلْبْلاَغَـــــــــــــــــا بَعْقُولْ اَرْجَاحْ

عَنّْهُمْ سْلاَمِي مَا لاَحْ بَدْرْ لِيلَتْ وَاحِــــــــــــــــــــي
عَدّْ لَرْوَاحْ اُكُلّْ أَشْبَــــــــــــــــــــاحْ

وَاسْمِي يَا حَافَظْ قَوْلِي صْغَاهْ مَنْ تَرْجَــــــــاحِي
وَضَّحُ فَالْمْيَا تُوضَــــــــــــــــــــــاحْ

قُلْ قَــــــــــــــــــالْ الْكًـَـنْدُوزْ اشْوَاهْدِ فْكُلّْ انْوَاحِـــــــي
للَرْسُولْ اَلْهَـــــــــــــــــــــادِي مَدَّاحْ

بِهْ نَتْوَسَّلْ لَكْ يا خَــــــــــــــــــــــالْقِي فْيُومْ اَرْواحِـــي
لاَتْوَاخَــــــــــــذْنِي يَــــاسَمَّــــــــــــــــاحْ

اقْبَلْ سَأْلِي وَرْحَمْ ضُعْفِي اسْتَاجَبْ الْتَلْحَـــــــــــــــــاحِي
حُرْمَتْ اَفْضَــــــــــايَلْ فَدّْ اَفْلَحْ