قصيدة صَلـِّي يَا كـُلّْ مَنْ احْضـَرْ
نظم الحاج محمد النجار           مبيت رباعي

القسم الاول

وَجْدِ وَكْرِحْتِي وْحُبِّي وَهْبُوبْ رْيَاحِي
شَعْلَتْ نَارْ الشُّوقْ فِي عْضَايْ لْظَاهَا لَحْلاحْ
وَتْقُوَّى لُومْ اللاّحِي
وَدْمُوعِي كَالسِّيلْ سَايْحَا

وَجْبْ نَبْكِي عْلَى اخْطَيَا وَهْتُوفْ مْزَاحِي
وَالنَّفْسْ اَلْمُرَّا وْكِيدْهَا يَرْمِي مَنْ سَلاَّحْ
وَالْمَتْوَكَّلْ بَشْبَاحِي
مَنْ يَسْرِي فِي كُلّْ جَارْحَا

عَذْرُونِي فِي ابْكَايْ طَابُو بَالدَّمْعْ الْمَاحِي
اَمَنْ لاَمُونِي اَمْلاَمْكُمْ مَالِي فِيهْ اصْلاَحْ
لُوذَقْتـُو سَمّْ جْرَاحِي
مَالَمْتُو عُشَّاقْ نَايْحَا

وَنَا مَالِي طْبِيبْ اِلاَّ مَنْ وَصْلْ لَلْمَاحِي
وَالَعْ بَصْلاَتْ خِيرْخَلْقْ الْغَنِي سَمَّاحْ
يَرْشَدْ رَشْدِ لَصْلاَحِي
بَكْمَالْ التُّوبَا النَّاصْحَا

الحربة
صَلِّي يَا كُلّْ مَنْ حْضَرْ وَتْحَلـَّى بَالْمَاحِي
وَعْلَى ءَالُ ارْضِي وْشَرَّفْ سِيَّدْ لـَمْلاَحْ
طَهَ كَنْزِي وَرْبَاحِي
وَزْهَارِي بَصْلاَهْ فَايْحَا

القسم الثاني
سارحة

مَنْ فَاقْ هَلَ الْبْهَا بْفَلْجَـا
خَدُّ سَرّْ وْعِينْ دَعْجَــا
وَاحْوَاجَبْ عَاطْفَا زْبَاجْ

وَالْبَاقِي فِي صْمِيمْ لَحْجَا
وَصْفُو مَايَنْتْهَا افْمُهْجَا
لُوكَانْ امْدَادْهَـــا امْوَاجْ

لَكِنْ مَدْحْ الرّْسُولْ فَرْجَا
نَالَتْ بِهْ الْكْرَامْ دَرْجَـا
الْقُرْبْ الْجَانْبُ اعْــلاَجْ

نَطْلَبْ مَنْ لاَيْنَامْ لَغْنِي يَطْلَقْ اسْرَاحِي
مَادَالِي لَلْحْبِيبْ شَايَقْ مَاصَبْتْ اجْنَـــــاحْ
وَزْدَاجَمْرِي تَلْحَاحِي
وَقْلُوبْ اَلْحَجَّاجْ فَارْحَا

مَانَنْسَا يُوْمْ زَالْ كُرْبِي وَغْنَمْتْ ارْبَاحِي
وُاقَـْضِيتْ امْنَاسْكِي وُزَرْتْ احْبِيبْ الْفَتَّاحْ
وَسْتُولِيتْ الْتـَسْبَاحِي
وَقْرِيتْ اَفْلُودَاعْ فَاتْحَا

وَتْلِيتْ اَلْصَاحَبْ الشّْفَاعَا وَشْعَلْ مَصْبَاحِي
وَتْجَلَى بَدْرِي عَلَى الْكْوَاكَبْ وَالْغِيمْ انْزَاحْ
وَكْمَلْ فِي لِيلَتْ وَاحِي
وَشْمُوسُو فَالفُلْكْ سَايْحَا

الحربة
صَلِّي يَا كُلّْ مَنْ حْضَرْ وَتْحَلـَّى بَالْمَاحِي
وَعْلَى ءَالُ ارْضِي وْشَرَّفْ سِيَّدْ لـَمْلاَحْ
طَهَ كَنْزِي وَرْبَاحِي
وَزْهَارِي بَصْلاَهْ فَايْحَا

القسم الثالث
سارحة

اَعْيُونْ اَلْعَارْفِينْ مَنْجَــــا
قَطْفُو مَنْ كُلّْ فَنّْ حَرْجَـا
وَاتَاوَهْ نَاسْهَا اَفْوَاجْ

بَصْنَافْ اَتْقَاتْ لُونْ ثـَلـْجَا
وَحْمَرْ قَانِي وُعِينْ عَلْجَا
وَبْرُودْ اَلْخَزّْ وَالدّْبَاجْ

وَالْقَاصَدْ مَايْخِيبْ يَرْجَـــا
مَنْ حِيّْ اعْرَابْهَا وْبَهْجَـا
وَنَا لالَضّْ لِي الْجَاجْ

طَالْ اَمْنَيَا وْبَاحْ سَرِّي وَقْوَى تَلْحَاحِي
كِيفْ انْظَلّْ انْبَاتْ بَالْهْوَى كَالْغُصْنْ اِلى مَاحْ
وَالرَّاحْ اَشْطَنْ لِي رَاحِي
وَالْقَلْبْ الْمَتْعُوبْ مَا سْحَا

مَا طَالْ الدَّاجْ وَالضّْيَا وَمْسَيَا وَصْبَاحِي
نْتْذَكَّرْ لـَيْلى وْحِيّْهَـــــا وَالنُّورْ اَلْوَضَّـــــاحْ
وَالْبِينْ ايْزِيدْ اجْيَاحِي
وَالْعَبْرَا عُقْيَانْ صَافْحَا

لَلَّه اَلْحَمْدْ جَادْ عَنِّي وَنْزَاحْ اَكْلاَحِي
وَرْجِيتْ اَلْمُولَى رْطَابْ حَبْلِي مَنْ بَعْدْ اَقْسَاحْ
وَجْرَى لِي نِيلْ ادْوَاحِي
وَطْيَارِي بَالْحَمْدْ فَاصْحَا

وَقْوَاتْ امْحَبّْتْ النّْبِي وَحْلَى عَسْلْ اجْبَاحِي
وَالنَّخْلْ ايْغَنِّي عْلَى اعْفَاهَا وِينْمَّا رَاحْ
وَعْمَرْ بَالْمَالْ امْرَاحِي
وَجْمَالِي فَالتَّلْ سَارْحَا

الحربة
صَلِّي يَا كُلّْ مَنْ حْضَرْ وَتْحَلـَّى بَالْمَاحِي
وَعْلَى ءَالُ ارْضِي وْشَرَّفْ سِيَّدْ لـَمْلاَحْ
طَهَ كَنْزِي وَرْبَاحِي
وَزْهَارِي بَصْلاَهْ فَايْحَا

القسم الرابع

سارحة

اِيَّامِي بَالْحْبِيبْ طَهْجَـــــا
وَالْحَاسَدْ مَنّهَا افْرَهْجَـــــا
لَكِنْ طَاوِي عْلَى الصّْنَاجْ

وَلْسَانِْ اِسَرّْ كُلّْ مَنْ جَــــا
وَالقَلْبْ كْمَا الظّْلاَمْ زَبْجَا
وَالتَّبْسِيمَا مَنْ الْغْنَـــــــاجْ

وَالدَّاعِي فِي اعْضَاهْ نَهْجَا
مَا هْجَا حَدّْ مَا تَهْجَـــــــا
مَنْ غِيرْ اللُّومْ وَاللّْجَـــاجْ

وَاجَبْ لُ عَنْ اخْطَاهْ يُهْجَا
حَتَّى يَقْرَا حْرُوفْ لَهْجَـا
وِيْرَدّْ اَلْبَـــــــالْ لَلنّْتَــــاجْ

قُلُ لَمّنْ هَدّْ بَالْحْرِيشْ عْلَى سَنّْ ارْمَاحِي
سَالْ عْلَى الْحَرْبْ يَالْغُرِّيَ رَايَسْ لَكْفَاحْ
وَعْلَى سِيفِي وَسْلاَحِي
وَعْلَى اَلْعَفَّا وَالْمْسَامْحَا

وَنَا سَلَّمْتْ لَلْقْبَرْ بَاقِي غِيرْ رْوَاحِي
يَجْعَلْ لِي رُوضَا فْضَلّْهَا مَنْ تَعْبِي نَرْتَاحْ
يَكْمَلْ قَصْدِي وَفْرَاحِي
وَكْفَانِي بَالطِّيبْ فَايْحَا

فِي ظَلّْ اَلْعَرْشْ وْالْقْيَامَا يَجْعَلْ مَرْكَاحِي
وَعْلَى الصِّرَاطْ كِيفْ نَاوِي بَرْقِْ اِلَى لاَحْ
وَالْجَنَّا جَلّ اشْرَاحِي
قُرْبْ اَلْهَادِي وَالْمْصَافْحَا

الحربة
صَلِّي يَا كُلّْ مَنْ حْضَرْ وَتْحَلـَّى
بَالْمَاحِي وَعْلَى ءَالُ ارْضِي وْشَرَّفْ سِيَّدْ لـَمْــلاَحْ
طَهَ كَنْزِي وَرْبَاحِي
وَزْهَارِي بَصْلاَهْ فَايْحَا

القسم الخامس
سارحة
نَهْجْ مْدِيحْ الَرّْسُولْ مَنْجَـا
بَطْرِيقْ اَلْوَالْعِينْ حَجَّــــا
لاَنَـــجْمْ ايْقُـودْ لاَسْرَاجْ

مَنْ يَحْكِي لَلْمْصَالْ حَدْجَا
وِيْقَِيسْ ضِيّْ النّْهَارْ بَدْجَا
يَتْسَمَّا فَــــــاسْدْ اَلْمْزَاجْ

مَارَتْقَــــــا لَلْفْلاَكْ عَرْجَـا
حَتَّى يَضْحَا لَغْلاَمْ ثَلْجَـــا
وَتْكَلّْ الشَّمْسْ فَــالبْرَاجْ

مَنْ لاَخَاضْ غْمُوقْ لَجَّــا
عَنّْ ذُرّْ نْفِيسْ ذَاتْ وَهْجَا
كِيفْ يْسُودْ عْلَى النّْتَاجْ

لَسْيَادْ ايَّــــــامْهُمْ بَلـْجـَــَـا
وَالْكِيَّسْ منّْهُــمْ يَنْجَــــــــا
وَالْوَاقِيهَـــا مَنْ الْهْرَاجْ

بَالْقُرْآنْ الْعْظِيمْ فَادُ جَبْرِيلْ اَلْوَاحِي
وَسْطَعْ نُورُ مْبَيَّنْ ضُوَّا عَنْ كُلّْ بْطَاحْ
وَخْبَرْهَا نَهْجْ فْلاَحِي
وَرْوَاتُو عُقَّالْ رَاجْحَ

وَسْرَا وَتْنَا بْفَرْضْ وَاجَبْ وَسْمَاهَا سَاحِي
وَنْذَرْ وَنْهَا عْلَى الظّْلالَى خِيرْ اَلْنـَّصَّاحْ
بَرْضَاهْ تْزُولْ جْيَاحِي
وَتْرِيعْ خْلاَكًِي اَلْكَالْحَا

ضِيّْ هْلاَلِي وْنُورْ شَمْسِي وَطْلُوعْ قْزَاحِي
غَايَتْ فَرْحِي عْلاَ جْ رُوحِي رَاحَتْ لَرْوَاحْ
تَجْعَلْ فَحْمَاهْ ارْوَاحِي
مُولْ اَلمُعْجِزَاتْ وَضْحَا

نَهِّيتْ مَنْ الدّْبَاجْ حُلـَّى صُلُ اَبْتُوشَاحِي
قَالْ النَّجَّار يَالْحَافَظْ قُوْلْ النَصَّاحْ
مَنْ بِهُمْ حَزْتْ فْرَاحِي
وَتْمَهَّدْتْ بْكُلّْ صَالْحَا

وَسْلاَمِي لَلدّْهَاتْ جَمْلاَ فِي كُلّْ انْوَاحِي
بَالطِّيبْ الْمَخْتُومْ وَالزّْهَرْ وَالْوَرْدْ أُمَافَاحْ
دُونْ أَهْلْ اَلْقَذْفْ أصَاحِي
لاَ تَعْبَا بُوشَاقْ نَابْحَا

احْسَنْ بَهْلْ لَحْسَانْ وَعْرَضْ عَنْ قُولْ اللاَّحِي
وَمْدَحْ طَهَ وُلا يْسَبّْ لْسَانَكْ مَدَّاحْ
مَنْ بِهْ اتْرَكْتْ مْزَاحِي
حَصَّنْتْ اَسْوَارِي الطَّايْحَا

الحربة
صَلِّي يَا كُلّْ مَنْ حْضَرْ وَتْحَلـَّى بَالْمَاحِي
وَعْلَى ءَالُ ارْضِي وْشَرَّفْ سِيَّدْ لـَمْــلاَحْ
طَهَ كَنْزِي وَرْبَاحِي وَزْهَارِي بَصْلاَهْ فَايْحَا