قصيدة دَهْبِيَّتْ الشْرُوقْ
للشيخ حسن بنشقرن           مكسور الجناح

الحربة
يَا نْدِيمْ اَسْقِينِي نَزْهَى بَكَاسْ لَعْرَاقِي * بُوجُودْ مَنْ اهْويتْ اَسْبِيغَتْ لَرْمَاقْ * يَا سَاقِي يَا سَاقِي * اَزْهَى عْلَى اَلْعَاشَقْ وَ الْمَعْشُوقْ * فَطْلُوعْ الدَّهْبِيَّا

القسم الأول
 قَالْ يَانَسِيدِي لِيلْ الْفْرَاحْ فِيهْ اَفْجَرْنَا خَلْعْ اَلْعْدَارْ * بَشْهَادَتْ اَلْبْهَا وَالشَّمْعْ وُ لَمْدَامْ * لِهْ خَضْعْ اَبْجِيشْ اُخُدَّامْ * صَافْحُ وَعْرَى لُو لَوْهَامْ * بَعْدْ لَمْكًـَـامْ * كًـَـفَّا وُ سَارْ اَمَامْ * زَادْ اَلْفْجَرْ اَلْحُكْمُ * اعْزَمْ ابْعَزْمُ * اَقْضَى ابْعَلْمُ* حُوَّطْ بَرْبُوعْ جَمْعْ لاَفَاقِي* فَسْمَاهْ كُلّْ فَجّْ اَكْسَى بَلْيَشْرَاقْ * مَتْرَاقِي مَتْرَاقِي* ضْيَاهْ شَعْشَعْ عَنْ كُلّْ اطْرُوقْ * بِهْ الرُّوحْ اَزْهِيَّا

القسم الثاني
قَالْ يَانَسِيدِي مَنْ قُبّْتْ اَلنّْصَرْ تَاكًـَـتْ عَزْمَتْ بَلْمْزَارْ* بِيزَرْهَا امْدَهَّبْ تَفْخُرْ وَتْصُولْ* مَا مْثَلْهَا زَهْوْ اَلَّعْقُولْ* زِينْ حُسْنْ اَبْهَاهَا مَكْمُولْ* فِيهْ لَنْجُولْ* نَظْرُو جْمَالْ لُوصُولْ* تَزْدَادْ ضَيّْ شَعَّالْ اَكْسَاتْ اَطْلاَلْ* بِهْ لاَزَالْ اَتْخَجَّلْ اَشْعَاعْ شُوفْ لَرْمَاقِي* عَذْرَا حْكِيتْهَا لَجْمِيعْ اَلْعَشَّاقْ*بَرْفَاقِي بَرْفَاقِي* اَوْجَتّْنِي فالرَّوْضْ اَلْمَوْرُوقْ* لَبْهَا عَطْفْ اَعْلِيَّا

القسم الثالث
قَالْ يَانَسِيدِي فَرْيَاضْنَا الزَّاهَرْ شَرْقْتْ فُوقْ اَلْشْجَارْ* بِهَا اَطْيَارْ لَهْوَى زَهْرَتْ فَدْوَاحْ* كَاتْسَبَّحْ نَعْمْ الْفَتَّاحْ* كُلّْ طِيرْ اَبْتَغْرَادُ صَاحْ* بَالْعَشْقْ بَاحْ* هَذَا اَلْذَاكْ بَفْصَاحْ* وَالْبُوحْ دَايْمْ اِيْبُوحْ اَبْقَلْبْ اسْمُوحْ زَهَّرْ اَلرُّوحْ* اَصْغَى لِيمَامْ هِيَّجْ اَشْوَاقِي* وَالْفَخْتْ وَامّْ لَحْسَنْ تَنْغَمْ بَشْوَاقْ* لَلْبَاقِي لَلْبَاقِي* اِسَبَّحُ اِشْرَاقْ اُ فَغْبُوقْ* مَا تَخْفَاهْ اَخْفِيَّا

القسم الرابع
قَالْ يَانَسِيدِي   شُفْ اَلْبْطَاحْ لاَحَتْ عَنْ حَرْجَاتُ اِيزَارْ* نَسْرِي وُ يَاسْمِينْ اُيَاسْ اُرَيْحَانْ*  وَالْحْكُمْ اُ الْفَنّْ اُسُوسَانْ* شُفْ بَلْفْجَجْ اُ كًـَـحْوَانْ* وَالزّْهَرْقَانْ* وَبْهَرْ اَعْشِيقْ يَرْقَانْ* خَابُورْ فِي اَفْنَانِي مَثْلِي فَانِي* مَنْ يَرْقَانِي وَمْشَرْقِيَّا فْغَايْتْ انْسَاقِي* فِي حُلّْتْ الْبْهَا رَاقْتْ لَلِّي رَاقْ* فَحْدَاقِي فَحْدَاقِي* انْظَرْتْ لَسْكًـَـلْمَاسِي  بَرْمُوقْ* حَلّْ اَبْعَشْقُ لِيَّا

القسم الخامس
قَالْ يَانَسِيدِي فَشْعَاعْهَا اَنْظَرْتْ تَعْكِيرْ اَخدُودْ اَلْجْوَارْ* وَبْسَاطْ رَوْضْنَا حَنْطْ اَبْكُلّْ اَدْبَاجْ بَالنّْمَارَقْ يبْهَرْ لَغْنَاجْ* رَاقْ وَزْهَا بِينْ اَلْهَيَّاجْ* خَاطْرِي هَاجْ* بُجُودْ هَاذْ لَغْنَاجْ* فَرْجَا خْلاَفْ فَرْجَا ضَيّْ اُفَدْجَا* اَسْرُورْ لَحْجَا لَبْهَا وَالرَّوْضْ طَرْبْ لَفْيَاقِي* هَذَا صْبَاحْ عِيدْ اَبْلاَمَتْ لَرْفَاقْ* بَتْفَاقِي بَتْفَاقِي* اَسْرُورْنَا زَهْوْ اَلْنَاسْ الذُّوقْ* فَصْبَاحْ اُ فَعْشَيَّا

القسم السادس
قَالْ يَانَسِيدِي لَفْرَاحْ بَلْمْلاَحْ اَرْبَاحْ وُرَاحْ اَلْفْكَار* بِهُمْ سَاعْتْ اَلْوَقْتْ اَلْعَطْفْ اَهْدَاتْ* جَالْبْ اَسْرُورْ اَلْرُوحْ الدَّاتْ* بِهْ شُبَّانْ اَمْعَ اَلْخَوْدَاتْ* رُوحَكْ اَزْهَاتْ* وَكْيُوسْ رَاحَكْ اَحْلاَتْ* انْتَ اَزْهُو اَلْدَاتِي طُولْ اَوقَاتِي اَحْيِي اَحْيَاتِي* مَا مَثْلَكْ رِيتْ لَلْعْلُو رَاقِي فَمْحَافَلْ الزّْهُو مَتْحَدَّقْ تَحْدَاقْ* تَحْدَاقِي تَحْدَاقِي* اَفْهَى فْكُونْ اَوْصَافَكْ مَحْدُوقْ* مَا تَحْصِيهْ اَسْجِيَّا

القسم السابع

قَالْ يَانَسِيدِي صَفْرَا اَمْرُونْقَا رَتّْبْهَا بِينْ اَلْزْهَارْ* بَكْيُوسْهَا اَمْلِهَا مَنْ كُلّْ اَنْوَاعْ* بَلْصْنَافْ اَتْقَرّْ اَلَّشْعَاعْ* كُلّْ لُونْ اَفْشَكْلُ تَرْصَاعْ* رَقّْ لَطْبَاعْ* فِي كُلّْ فَجّْ مُطَاعْ* وَنْتَ لْبِيبْ مَشْنُوعْ اَفْكَلّْ اَرْبُوعْ* بِكْ مُولُوعْ اَجْمِيعْ مَنْ ذَاقْ كَاسْ لَمْدَاقِي* مَا كِيفْ رَاحَكْ اَفْرَاحْ اَلْهَلّْ لَذْوَاقْ* تَحْقَاقِي تَحْقَاقِي* فْنُوعْ طَرْزْ اَصْفَرْتَكْ مَوْتُوقْ* فِيهْ اَدْهَاتْ اَدْهِييَّا

القسم الثامن
قَالْ يَانَسِيدِي لَذّْ اَلْمْدَامْ كُبّْ اُ غَدَّرْ وَسْقِ اجْهَارْ* مَنْ خَنْدْرِيسْ وَفْهَاجِي وَسَرْخْدِي* وَالرّْحِيقْ اَعْلاَجْ اَلْجَسْدِي* وَالْعْرَاقِي يَفْجِي نَكْدِي* سَعْدْ سَعْدِي* خَدّْ لَبْهَا لْخَدِّي* ولِي اَنْرِيدْ وَدُّ* لَنِّي عَبْدُ اَبْطِيبْ قَصْدُ هَاتْ اَلْجَرْيَالْ كَاسَكْ اَدْهَاقِي* وَمْجِيّْحَي وُ لَلْحُومِيَّا مَشْتَاقْ* لَخْلاَقِي لَخْلاَقِي* اَسْرُورْ بُوغَلْيَا قَبْلْ اَنْذْوقْ* صَهْبَا وَقْسِيسِيَّا

القسم التاسع
قَالْ يَانَسِيدِي غَارْ اَلْفْهَاجْ وَالْفَنْجَلْ مَنْ شَهْدْ اَلْثْغَارْ* بَمْصَالْ فَاقْ طَيْبْ اَرْحِيقَكْ فَلْكَاسْ * فِي اَصْفَاهْ اَنْظَرْتْ اَبْلَغْلاَسْ* وَرْدْ وَزْهَرْ مَابِينْ اَلْيَاسْ* بِهْ لَكْبَاسْ* اَنْزَاحْ بِينْ لَوْنَاسْ* وَالزِّينْ زِينْ فَاسِي* غَدَّرْ كَاسِي* اَزْهُو اَغْلاَسِي* بِهْ فَالَفْرَاحْ لَذّْ تَعْنَاقِي* نَبْغِي اِيجُودْ لِي وَلْفِي بَالتَّعْنَاقْ* فرْوَاقِي فَرْوَاقِي* اِيحُوزْنِي كَلاَّمْ اَلْمَرْشُوقْ* حُوزَانْ اَلْوَلْفِيَّا

الدريدكة
 لاَ يْعَاقَبْ فَرْحْ اَسْرُورِي اَبْلِيعْتْ اَفْرَاقِي* لاَخِيرْ يَا نْدِيمْ فْسَاعَتْ لَفْرَاقْ* بَشْوَاقِي بَشْوَاقِي * اَلْمَنْ اَهْوِيتْ اَشْكِيتْ مْنَ اَلشُّوقْ* بَحْضُورْ الذَّهْبِيَّا

هَكْذَا حَالِي طَرْزِي فَلْدْوَاقْ عَشَّاقِي* لَهْلْ اَلْهْوَى اَزْهُو مَتْرَوْنَقْ رَوْنَاقْ* فَوْرَاقِي فَوْرَاقِي* اَمْدَخّْرُ لَلْفَرْجَاتْ اِيسُوقْ* فَوْقَاتْ الذَّهْبِيَّا

نَلْتْ قَصْدِي بَلِّي نَهْوَى نْحَمْدْ خَلاَّقِي* وَزْهَرْتْ بَلْعْطَفْ مَنْ دَاخَلْ لَخْلاَقْ* مَابَاقِي مَابَاقِي* اَجْفَا فْقَلْبِي مَنُّ مُوسُوقْ* بَشْهُودْ الذَّهْبِيَّا

هَاتْ لِي نَتْغَلْغَلْ مَنْ صَرْفْ فَنْجَلْ اَعْتَاقِي* مَا حَدّْ لاَمَتْ الْفَرْحْ اَفْطِيبْ اَتْفَاقْ* يَشْرَاقِي يَشْرَاقِي * اَزْدَادْ نُورْ اَلْنُورُ مَلْحُوقْ* شَرْقْ عْلَى الذَّهْبِيَّا

خُدْ حَكْمَا مَرْوِيَّا فَايْزَا بْتَرْقَاقِي* مَطْوِي فْسَرّْهَا لَلْعَاقَلْ تَحْقَاقْ* فَغْسَاقِي فَغْسَاقِي* اَنْظَرْتْ لَلْفْجَرْ اَرْجَعْ مَلْحُوقْ* وَطْلَعْتْ الذَّهْبِيَّا

نَزَّهْ اَفْكَرْكْ اَفْمُلْكْ الله سَبَّحْ اَلْبَاقِي* بَالرُّوحْ وَ الْحْجَا يَقَّضْ مَنْ لاَ فَاقْ* اِيلْحَاقِي اِيلْحَاقِي* اَلْهَلْ اَلْفَتْحْ اَفْعَلْمُ مَسْبُوقْ* مَنْ خَلْقْ الذَّهْبِيَّا

والسّْلاَمْ اَلَّسْلاَمْ اَفْكُلّْ حَالْ سَبَّاقِي * مَنْ كُلّْ طِيبْ نَهْدِيهْ اَفْكُلْ اَمْسَاقْ* فَزْوَاقِي فَزْوَاقِي* عْلَى الدّْوَامْ اَبْطِيبُ مَدْفُوقْ* فَتْمَامْ الذَّهْبِيَّا

وَاسْمِي بِينْ اَلْحَا وَالنُّونْ سِينْ فَمْسَاقِي* اَرْضَ لْمَنْ اَرْضَى وَلْغِ مَنْ لاَ طَاقْ* تَدْقَاقِي تَدْقَاقِي* اَلْمَنْ اَدْرَاوْ اَبْسَرُّ مَخْلُوقْ* فَرْجَا للَذَّهْبِيَّا