قصيدة حَلُّومْ
للشيخ محمد بلكبير   مبيت ثلاثي

القسم الأول
قَلْبِي مَنْ الْهْوَى مَكْلُومْ
شُفْ الْبْهَا اسْبَانِي يُومْ امْشاوْ الْقْدامْ
يَحْسَنْ عَوْنِي مَيْسُورْ صَادْنِي لَغْرَامْ

لَهْوَى مَنْ الْبْهَا مَعْلُومْ
انَا كْوِيتْ بَالْعِينْ عْلَى الشُّوفَا اقْوامْ
اَلَطِيفْ اَلَطِيفْ مَنّْهُمْ انْيَامْ

خَرْقُوا دْوَاخْلِي بَسْهُومْ
هَانِي مْعَ الْهْوَى نَتْكًـَلَّبْ قُوتِي احْرَامْ
وَالِّي نَهْوَاهَا مَا سْقَاتْ لِي لَمْدَامْ

يَقْضَانْ مَا ضْفَرْتْ بْنُومْ
لْمَنْ انْعِيدْ يَاخُدْ بِيدِي كُلِّي اوْهَامْ
غِيرْ الرُّقْبَانْ وَلاَ حْسِيبْ مَنْ لَكْرَامْ

رَفْدُ الطَّايْحْ الْمَغْرُومْ
اَجِوْ يَا هْلِي رَغْبُ لِي تَاجْ الرّْيَامْ
كًُلُو لَحْلِيمَا يَا عْلاَجْ كُلّْ سْقَامْ

الحربة
كًـُلُو اَلاَّلاَّ حَلّــُومْ
عَطْفِي عْلَى الْعْشِيقْ الْفَانِي مَنْ بِكْ هَامْ
طَرْفُ لَغْزِيرْ ابْقَا سْهِيدْ دُونْ امْنَامْ

القسم الثاني
رَغْبُو اَرْوَامْكًـْ الزَّهْزُومْ
فِيَّا تْراقَبْ اغْرَامِي مَنْ قَبْلْ الْعْدَامْ
تَرْحَمْنِي بَالزُّورَا وُ مَنْ ارْحَمْ يُرْحَامْ

رَانِي بْحُبّْهَا مَتْيُومْ
مَنْ يُومْ مَا نْظَرْتْ ابْهَاهَا لَعْقِيلْ هَامْ
هَدِي هِيَّ هَدِي اجْمَعْتْ لِي التّْمَامْ

تَرْكَاتْنِي غْرٍيبْ الْقُومْ
الاَرْضْ كَاتْبَانْ اَمَامْ اُ خَلْفِي اظْلاَمْ
لاَ حَدّْ اظْهَرْ لِي اصْدِيقْ مَنْ لاَنَامْ

مَنْ لاَ ادْرَى الْحَالْ يْلُومْ
وَلِّي ادْرَى اغْرَايَبْ عَشْقِي يَنْفِي المْلاَمْ
اَنَا الْكَاوِ كِيَّا امْخَرّْقَا لَجْسَامْ

هَانِي مْعَ الْغْرَامْ انْهُومْ
وَنْعَلَّمْ الْوْرَاشَنْ تَغْرِيدْ اهْلْ الْهْيَامْ
كِيفْ ارْوِيتُ وُمَنْ الْهْوَى بْلاَ تَعْلاَمْ

الحربة
كًـُلُو اَلاَّلاَّ حَلّــُومْ
عَطْفِي عْلَى الْعْشِيقْ الْفَانِي مَنْ بِكْ هَامْ
طَرْفُ لَغْزِيرْ ابْقَا سْهِيدْ دُونْ امْنَامْ

القسم الثالث
لَعْشِيقْ مَا يْكُونْ اسْئُومْ
رَاضِي بْمَا رْضَاتْ احْلِيمَا بَدْرْ التّْمَامْ
مَانَا اِلاَّ لَجْمَالْهَا اوْصِيفْ اغْلاَمْ

وُبْغَايْتْ الرّْضَى فَالسُّومْ
مَلَّكْتْهَا النَّفْسْ الْمَحْبُوبَا بِيعْ تَامّْ
مَنْ لِّي تَرْضَانِي كَانْ سَاعْدَتْ لِيَّامْ

لِهَا اجْهَرْتْ بَالْمَكْتُومْ
يَعْلاَنْ مَا خْفِيتْ الْحُبْ اهْدَرْتْ اللّْتَامْ
هَمَّا وَعْنَايَا حُبّْهَا وَعَلْوْ مْقَامْ

لَعْرَابْ قَاطْبَا وَالرُّومْ
بَالْحُبْ وَالْهْوَى تَعْتَرَفْ عَرْبْ اُ عْجْامْ
مَنْ لاَ يَتْخَلَّقْ بَلْهْوَى مَثْلْ لَنْعَامْ

وَنَا مْعَ الْهْوَا مَلْزُومْ
بِينْ الرّْجَا وُبِينْ الْخُوفْ نَطْلَبْ الدّْمَامْ
هَذَا حَالِي وَالْحُبْ مَا يْلِيهْ اتْمَامْ

الحربة
كًـُلُو اَلاَّلاَّ حَلّــُومْ
عَطْفِي عْلَى الْعْشِيقْ الْفَانِي مَنْ بِكْ هَامْ
طَرْفُ لَغْزِيرْ ابْقَا سْهِيدْ دُونْ امْنَامْ

القسم الرابع
اَمْدَانْ صَنْعْتُ مَنْضُومْ
بَايَعْتْ فِيهْ لَحْلِيمَا وُطْوِيتْ الْعْلاَمْ
زَهْوَا وَ نْزَاهَا صْنَعْتُ اَلْهَلْ لَغْرَامْ

اهْلاَلْ اشْرَقْ بِينْ النّْجُومْ
هَانِي عْلَى ابْهَاهْ امْغَزَّلْ وَعْلَى النّْظَامْ
هَبْتْ اقْلاَمِي فَهْوَا مْحَبّْتِي رَكًامْ

نَزَّلْتْ طَابْعِي مَرْسُومْ               
نَجْلْ الْكْبِيرْ مُحَمَّدْ عَلْ لْجْحُودْ ضَامْ
بَهْجَاوِي مَا يَخْفَا فْكُلّْ قَطْرْ اهْمَامْ

اَحَافْظْ اللّْغَا مَفْهُومْ
نُوصِيكْ كُنْ عَايَقْ حَرْبِي خُذْ الْكْلاَمْ
وَرْوَاهْ عْلَى التَّحْقِيقْ لاَ اتْجِيبْ مْلاَمْ

وَهْدِي اسْلاَمْنَا بَنْسُومْ
لَهْلُ وُلاَ تْعَبَّرْ وَالْجَاحَدْ بَالْجَامْ
فِيدِيكْ اُسِيفْ اكْلاَمْنَا قْطَعْ لَكْلاَمْ

الحربة
كًـُلُو اَلاَّلاَّ حَلّــُومْ
عَطْفِي عْلَى الْعْشِيقْ الْفَانِي مَنْ بِكْ هَامْ
طَرْفُ لَغْزِيرْ ابْقَا سْهِيدْ دُونْ امْنَامْ