قصيدة بهجة لمتون
زيارة السلطان مولاي عبد الرحمان لمراكش
نظم السي التهامي لمدغري

الحربة
أبَهْجَتْ لَمْتُونْ بِينْ لَمْدُونْ اَسْتَفْخْرِي عَنْ جْبَالْهَا وَوْطَاهَا
جَاكْ مُوْلاَيْ عَبْدْ اَلرَّحْمَانْ
وَللَّهْ اَلْحَمْدْ بَالسّْلاَمَا جَا مِيرْ اَلْمُومْنِينْ كَنْزْ اَغْنَاهَا
جَا هْمَامْ اَلْعَزّْ وُ لاَمَانْ

القسم الأول

شُوفْ أَشْعَاعْ اَلشَّمْسْ لاَحْ فُوقْ اَلْبَهْجْ اَلْحَمْرَا وُزَادْ حُسْنْ أَبْهَاهَا
يُومْ لَرْبِعَا لِهَا شَانْ

شُوفْ أَصْمَاعِهَا  اَمْبَهْجَـــــا شُوفْ اَلْكُتْبِيَّا اَلْبَاهْيَــــا مَعْلاَهَا
اَمْجَرّْدَا مَنْ لَبْعِيدْ اَتْبَانْ

شُوفْ اَلنَّخْلْ إِيْمِيسْ كَنّْ خَوْدَاتْ اَمْعَرْبْطَاتْ بْلاَ اَمْدَامْ دُونْ اَهْوَاهَا
حَنْطَا لَلْوَصْلْ فْحِيجَانْ

فَرْحَتْ بَقْدُومْ اَلْهْمَــــامْ اَتْزَيَّنْتْ لْمَلْگَـــــاهْ زِينْهَا وَاتَـــــــاهَا
اَمَرْحْبَا قَالَتْ يَا سُلْطَانْ

الحربة
أبَهْجَتْ لَمْتُونْ بِينْ لَمْدُونْ اَسْتَفْخْرِي عَنْ جْبَالْهَا وَوْطَاهَا
جَاكْ مُوْلاَيْ عَبْدْ اَلرَّحْمَانْ
وَللَّهْ اَلْحَمْدْ بَالسّْلاَمَا جَا مِيرْ اَلْمُومْنِينْ كَنْزْ اَغْنَاهَا
جَا هْمَامْ اَلْعَزّْ وُ لاَمَانْ

القسم الثاني
السارحة

سِيدِي حَلَّتْ بِهْ اَحْلُولْ       وَفْتَخَرْ بِهْ وُصَـــــالُــو
فَــــارَسْ زَهْلُــــولْ       هَازَمْ بَصْقِيلْ اَنْصَالُو
اُمْنِيــــــنْ اَيْطُـــــــــولْ       يَقْطَعْ لَلْوَغْدْ أَفْصَالُــو

أَهْلاُ وَهْنِيَّا وُمَرْحْبَـــــا بَالْمْكَرُومْ سْمَا هْلاَلْهَــــــا ضُــــــــــــوَّاهَا
بْنُورْ وَجْهْ بْدُورْ اَلدِّيجَانْ

خَصْلَتْ اَلْمْلُوكْ بَاَلرْضَى جَمْعْهَا اَلْهْمَــــــــــــامْ فَايَزْ بْمَعْنَـــاهَا
حَازْهَا بَدْلِيلْ وُبُرْهَانْ

اَمْرَزَّنْ فَـــاْمُورُو اَمْحَكَّمْ اَوْفَعْلْ اَلْخِيرْ حَقّْ مَـــــــا يَتْنَـــاهَا
وَاَلشّْجَاعَا يُومْ اَمِيدَانْ

اَلتَّهْذِيبْ وُغَــايَتْ اَلسّْيَاسَا وَ كْتُوبْ اَلْعَلْمْ حَـــــــازْ وَسْتَوْلاَهَا
لِهْ نَعْمْ اَلْمُولَى عَوّانْ

الحربة
أبَهْجَتْ لَمْتُونْ بِينْ لَمْدُونْ اَسْتَفْخْرِي عَنْ جْبَالْهَا وَوْطَاهَا
جَاكْ مُوْلاَيْ عَبْدْ اَلرَّحْمَانْ
وَللَّهْ اَلْحَمْدْ بَالسّْلاَمَا جَا مِيرْ اَلْمُومْنِينْ كَنْزْ اَغْنَاهَا
جَا هْمَامْ اَلْعَزّْ وُ لاَمَانْ

القسم الثالث
السارحة

سِيدِي صَافِي اَلْوْصَافْ    مَنْ صُغْرُو عَابَدْ صَافِي
شَلاَّ يُـــــــــــــوصَــــافْ    وَلاَ يَقْـــــــــوَى تُوصَـافِي
اَعْيَــــــــا اَلْوَصَّــــــافْ    سُلْطَانْ اَلْمَجْدْ اَلصَّــــــــافِي

غَطَّى بِهْ اَلله اَهْلْ اَلْبِيتْ وُنَاسْ اَلْقُرْآنْ صَانْهَا وَاحْضَــــــاهَا
وَاَلرّْعِيَّا رَگْدَتْ فَمَانْ

بِهْ اَلْمُلْكْ اَحْيَـــــــا وُسَطْعَتْ اَنْوَارُو لاَحْ ضَيّْهَا وَسْنَـــــــاهَا
وَلاَ بْقَى لَلْحَاسَدْ اِيْوَانْ

اَزْهَرْ فِي غُبَّى وَلاَ بْقَــــــــاتْ اَدْيَابْ اَتْعَوَّگْ لِهْ مَنْ يَمَّـــــــاهَا
هَبَّتْ اَرْيَاحُو لَلْعَرْفَانْ

ضلّْلَتْ اَشْجَــــارُو عْلَى اَلرّْعِيَّا اُرْتْعَاتْ فَنْوَارْهَا وُطِيبْ عْفَــــــاهَا
صَالْ بِهْ اَزْمَانُو وَزْيَانْ

الحربة
أبَهْجَتْ لَمْتُونْ بِينْ لَمْدُونْ اَسْتَفْخْرِي عَنْ جْبَالْهَا وَوْطَاهَا
جَاكْ مُوْلاَيْ عَبْدْ اَلرَّحْمَانْ
وَللَّهْ اَلْحَمْدْ بَالسّْلاَمَا جَا مِيرْ اَلْمُومْنِينْ كَنْزْ اَغْنَاهَا
جَا هْمَامْ اَلْعَزّْ وُ لاَمَانْ

القسم الرابع
السارحة

سِيــدِي نَعْمْ اَلسُّلْطَــــــــــانْ        وَدُّو اَلْعْظِيمْ اَلْغَــــــــــــــانِي
اَعْطَــــــــــــاهْ اَلشَّــــــــــــــــانْ       شَرْقْ وُغَرْبْ اَلْجُوَّانِــــــي
مَعْــــــــــــدَنْ لِيمَـــــــــــــــــانْ     غَطَّى عِيبِي وَغْنَـــــــــــانِي

هَادِي مَمْلَكَـااَمْحَجّْبَــا رَبِّي غَطَّـــــــــاهَا اَبْهِيبْتُو وَحْضَــــــــاهَا
مَنْ اَهْرَبْ لِيها مَا يُوهَانْ

هَادِي مَمْلَكَــــا اَمْدَخّْمَـــا مَحْفُوظَــــــا بَاللهْ سَرّْهَا وَسْنَـــاهَا
اَمْحَصّْنَا بْآَيَاتْ اَلْقُرْآنْ

هَادِي مَمْلَكَــا مْشِيّْدَا مَرْفُوعَــــا بَالْهَـــــاشْمِي اَلْهَـــادِي طَهَ
صِغْ تَغْنَمْ زَهْرْ اَلسّْلْوَانْ

هَادِي مَمْلَكَــــا عْلَى اَلشُّكْرْ وَالْحَمْدْ وُنَشْأَتْ اَلْكْرِيمْ أَعْطَــــاهَا
اَلنّْبِي وَصْحَابُو ضَمَّانْ

الحربة
أبَهْجَتْ لَمْتُونْ بِينْ لَمْدُونْ اَسْتَفْخْرِي عَنْ جْبَالْهَا وَوْطَاهَا
جَاكْ مُوْلاَيْ عَبْدْ اَلرَّحْمَانْ
وَللَّهْ اَلْحَمْدْ بَالسّْلاَمَا جَا مِيرْ اَلْمُومْنِينْ كَنْزْ اَغْنَاهَا
جَا هْمَامْ اَلْعَزّْ وُ لاَمَانْ