قصيدة اَلجَّـــــــــــارْ
للشيخ محمد لكبير بن عطية          مبيت ثنائي

القسم الأول
اَمَنْ اَهْوَاكْ عذّْبْ قَلْبِي وَفْنَانِـــــي
وَفْنَانِي خَلَّى اَمْدَامْعِي طُوفَـــــانْ

طُوفَانْ فَوْقْ خَدِّي وَاَليَوْمْ اَجْفَانِـــي
اَجْفَانِي مَحْبُوبْ خَاطْرِي بَبْيَــــانْ

بَبْيَانْ خَادْ عَقْلِي وَخْرَبْ  دِيوَانِـــي
دِيوَانِي بِينْ اَلْفْضَا اَبْقَى حَيْــــرَانْ

الحربة
حَيْرَانْ يَاهْلِي شِي يْعَطَّفْ جِيرَانِــي
جِيرَانِي لَغْدَرْ عَيْبْ لَلجِّيـــــرَانْ

القسم الثاني
سارحة
جِيرَانْ مَا تْدُوزْ الْجَـارْ
وَالْجَارْ مَا بْقَى مَهْجُورْ

مَهْجُورْ بِينْ صَهْدْ  اَلنَّارْ
وَ اَلنَّارْ كَاتْزِيدْ اَشْرُورْ

اَشْرُورْ مَاطْفَاهْ اَمْطَـارْ
اَمْطَارْ اَوْ مُوجْ اَبْحُورْ

اَبْحُورْ فَايْضَا زَادَتْنِي تَمْحَانِـــــي
تَمْحَانِي زَادْ اُزْدَادْ بَالتِّيهَــــــانْ

تِيهَانْ مَالْكِي نَازَلْ لِي فَمْكَانِـــــي
اَمْكَانِي تَمْلَى اَبْخِيلْ  وَالْفُرْسَــــانْ

فُرْسَانْ مَنْ اَطْغَاتْ اَلْخَيْلْ اَلْعَتْقَانِـــي
عُتْقَانِي خَلاَّوْ سَاكْنِي  وَلْهَـــــانْ

الحربة
وَلْهَانْ يَاهْلِي شِي يْعَطَّفْ جِيرَانِـــي
جِيرَانِي لَغْدَرْ عَيْبْ لَلجِّيـــــرَانْ

القسم الثالث
سارحة
جِيرَانْ بَالْوْصَالْ اَتْرُوفْ
اَتْرُوفْ مَاتْدُوزْ اَولِــيفْ

اَولِيفْ سَاكْنُ  مَدْنُـوفْ
مَدْنُوفْ وَالْقْلِيبْ اَرْهِيـفْ

اَرْهِيفْ بَالْهْوَى مَخْطُوفْ
مَخْطُوفْ وَالْبْدَانْ اَضْعِيفْ

اَضْعِيفْ يَاتْرَى يَتْبَدَّلْ غِيوَانِـــــي
غِيوَانِي يَرْقَى وُحَالْتِي  تَزْيَـــــانْ

تَزْيَانْ فِي اَقْرِيبْ اِيكًبَّلْ سُلْطَانِــــي
سُلْطَانِي بِيدُو اَنْغَدَّرْ كِيسَــــــانْ

كِيسَانْ اَلرّْحِيقْ عْلَى كُلّْ اَلْوَانِــــي
اَلْوَانِي وَنْمِيسْ بَالْهْوَى سَكْــــرَانْ

الحربة
سَكْرَانْ يَاهْلِي شِي اِيْصَبَّرْ  جِيرَانِــي
جِيرَانِي لَغْدَرْ عَيْبْ لَلجِّيـــــرَانْ

القسم الرابع
سارحة
جِيرَانْ نَاشْطَا بَالـرَّاحْ
بَالرَّاحْ وَالْصْحَابْ اَتْمِيــحْ

اَتْمِيحْ وَاَلشّْمَعْ نُــوَّاحْ              
نُوَّاحْ بَاَلدّْمُوعْ اَتْسِيــــحْ

اَتْسِيحْ وَالْوْتَارْ اَصَـاحْ
اَصَاحْ واَلرّْبَابْ اِيصِيـــحْ

اِيصِيحْ وَالْغْزَالْ اِيْجَاوَبْ لَلْغَانِـــي
وَالْغَانِي صُوتُو يْدَهَّبْ لَحْـــــزَانْ

لَحْزَانْ يَنْقْلَبْ بَسّْرُورْ  وُسَلْـــوَانِي
سَلْوَانِي بَوْصَالْ قَدّْ غُصْنْ اَلْبَــــانْ

اَلْبَانْ فِي رْيَاضْ اَمْحَتْفَلْ يَهْوَانِـــي
يَهْوَانِي وَنَا كَْبَالْــــهَا نَشْـــوَانْ

الحربة
نَشْوَانْ يَاهْلِي شِي اِيْصَبَّرْ جِيرَانِــي
جِيرَانِي لَغْدَرْ عَيْبْ لَلجِّيـــــرَانْ

القسم الخامس
سارحة
جِيرَانْ عَنّْهُمْ اَسْــلاَمْ
اَسْلاَمْ بَالزّْهَرْ مَخْتُـــومْ

مَخْتُومْ طَابَعْ بَنْسَــامْ
بَنْسَامْ طِيبْتُ مَنْسُــــومْ

مَنْسُومْ فَاتَحْ اَلتَّبْسَــامْ
تَبْسَامْ مَنْ اَثْغَرْ مَبْسُـــومْ

مَبْسُومْ اَسْمِي مِيمْ وُحَا كَفَانِـــــي
كَفَانِي مِيمْ وَاَلدَّالْ بَاَلتَّبْيَـــــانْ

تَبْيَانْ ضِفْ بْيَانْ اَلزَّوْرْ اَمْعَانِـــي
لَمْعَانِي عَنْدِي اَمْفَنّْنَا تَفْنَـــــانْ

تَفْنَانْ يَفْتَنْ مَنْ جَحْدُ مِيزَانِـــــي
مِيزَانِي زَهَّى اَكْهُولْ وَاَلشَّبَّـــانْ

شُبَّانْ وَ الْقْوَافِي مَنْ فَضْلْ اَلْغَانِــي
اَلْغَانِي فَضْلُ اِيعَمّْنَا لَلْئـــــانْ

لَلْئانْ وَالْقْبَرْ وَالْبَعْثْ اُلَمْحَانِــــي
لَمْحَانِي حَاشَا اَنْشُوفْهَا  بَعْيَـــانْ

الحربة
بَعْيَانْ يَاهْلِي شِي اِيْصَبَّرْ جِيرَانِــي
جِيرَانِي لَغْدَرْ عَيْبْ لَلجِّيــــرَانْ